支持 3.5mm + 2.5mm 平衡輸出！Onkyo DP-CMX1 水貨抵港，開價八千！
唔講咁多，直接講價錢，Onkyo DP-CMX1 第一水賣價為 $7980，差不多成八千蚊，可以換到一部點樣嘅手機呢？DP-CMX1 係一部喺音質方面超級屈機的手機，用上兩粒 ESS ES9018C2M DAC 晶片以及 ES9601K 擴大晶片，並且同時支持 3.5mm 以及 2.5mm 平衡輸出，前者可以對應 16Ω 至 600Ω 的耳機，而後者則可以對應 32Ω 至 600Ω 的耳機，講音質，肯定在手機界來說，無機能及 (包括 LG V20)。另外，DP-CMX1 可以支持 DSD 11.2MHz 以及 24bit 384kHz 的 WAV、FLAC 等格式，並具有四段增益控制。
內置 128GB ROM，有三千電支持快充！外型似專業音樂播放器！
硬體配置方面，Onkyo DP-CMX1 採用了 5 吋 FHD 屏幕，整體設計雖然係型，但版主上手拎過，初步感覺是比較笨重同埋偏厚，音量控制同一般手機不同，係以旋轉式的設於機背位置，而側面除左有開關鍵之外，同時亦好似市面的音樂播放器咁，有播放、下一曲、暫停等控制鍵 (真心覺得好正呀～
)。DP-CMX1 配備了 Qualcomm S650 處理器，內置 3GB RAM 以及 128GB ROM，並支持最大 256GB microSD 擴充。相機部份 DP-CMX1 採用了 Sony Exmor RS 等級的 1600 萬像素，而前置鏡頭則有 800 萬像素。另外，DP-CMX1 具有 3000mAh 電池，號稱能夠通話 25 小時，或者播放音樂 20 小時，並支持 QC3.0 快速充電、雙卡雙待等功能。香港行貨預計三月中到，估價約五千！
至於香港會唔會賣呢？版主收到風: 一定會！預計大概 3 月中左右會在香港推出，但賣價幾錢呢？就暫時未知，不過睇番日本售價 84800 日圓，估計黎到香港大約 5 千蚊左右啦～唔知呢部 Onkyo DP-CMX1，網友又覺得正唔正呢？如果行貨真係五千幾，你會唔會考慮入手？留言討論下啦！俾多啲 Onkyo DP-CMX1 上手圖大家睇下啦:
▲ 配備了 5 吋 FHD 屏幕，整體成部機好似好笨重咁，但係型嘅～
▲ 上方有 800 萬像素的前置相機，唔算差啦！
▲ 左下角會見到寫住 HIGH-RESOULUTION AUDIO 的字樣。
▲ 背後上方會見到有 1600 萬像素的主鏡頭，而側邊會見到圓形旋轉式音量控制。
▲ 而下方會有 TWIN DAC 的字樣。
▲ 機身側面會好似專業音樂播放機咁，有播放、暫停、上一曲、下一曲、開關等按鍵。而最上方亦有個 HOLD 嘅制，開左佢就可以一直 lock 住個 screen，等你點郁都郁唔到佢。
▲ 唯一缺點就係機身比較偏厚。上圖係同三星 S7 Edge 的比較。
▲ 底部會有 USB 插槽以及喇叭。
▲ 而頂部就有 3.5mm 以及 2.5mm 輸出。版主手頭上沒有耳機，所以想試都無得試，不過都有開過 YouTube 播過音樂，覺得推力都好充足，音量夠大聲之餘，而且都好清晰。唔知網友對呢部機有無興趣呢？
鳴謝及查詢：三禾電氣23740618 （旺角） 23740718 （銅鑼灣）