易加難減! 中國移動限速 Plan 月費加價! 又破百

Keith Yim 2015-07-16 21:59 | 中國移動香港

仲可以用一百蚊有找，用到限速無限上網嗎？今日起，你又少了一個選擇。早前數碼通靜靜雞將限速 3G 上網計劃，由 $96 加至 $106，都估其他台會跟風。但估唔到搶先跟係中國移動香港。由 23/7 起，佢地嘅 Lite Data，限速 4G 上網計劃，收費跟數碼通睇齊：即係加價。你想一百蚊有得無限上網，都有計! 版主順手教埋你。 



上次數碼通加價，係靜靜雞。限速上網計劃，由本來 $96 加至 $106 (已包括 $18 行政費)，只係更改了網站資料，今次中國移動香港都係一樣，把 Lite Data 計劃加了附注，會係七月廿三日起，月費加價至 $88，由於要每月多收 $18 行政費，即係每月總支出係 $106。相信今次中國移動香港肯跟風，因為佢地跟數碼通最大分別係用 4G 網絡提供服務，雖然寫明只給予 384kbps 嘅速度，但實際有 500kbps 速度左右，兼無限上網。而暫時未加價嘅Sun Mobile ，都係用 4G 提供服務，但係每月用爆 2GB 用量，再限速 128kbps。


▲ 本來 $78 的 4G 限速上網計劃，已加到 $88，加埋每月行政費 $18，要 $106！破百了。由 7 月 23 日起生效。



▲ 咁市面上仲有無真正無限上網，月費又唔駛一百蚊呢？有的！有一個叫潤訊通信 CMMobile 網絡商，透過租用 CSL 網絡，提供 3G 最高速度 384kbps 嘅無限上網計劃，月費都係 $80，更寫明免行政費。似乎係窮苦上網族嘅最後歸宿。