Truphone 推本地服務
今次推出服務嘅網絡商，唔係 CMHK 都唔係 SUNMobile，係一個叫 Truphone 嘅公司。或者大家未必聽過 Truphone，會唔會好似 EasyCall 咁突然執粒架？其實 Truphone 係一間國際公司，專門提供國際漫遊通訊計劃，比較出名是香港、英國一卡多碼服務。Truephone 是香港持牌 MVNO 虛擬流動網絡商之一，比 EasyCall 安全好多。 Truphone 一向都係針對商業客戶，在香港暫時未有門市。而今次是少有地廣發電郵推廣，大賣其香港本地服務計劃。
呢個服務係限時優惠來，月費 $88 有5GB 的本地數據。版主問過，呢 5GB 其實係透過 csl. 嘅 3G 網絡提供，速度唔會快過 3Mbps，即係限速 Plan 啦。而 Truphone 表示，最快第三至第四季，先會升級俾大家用 csl 嘅 4G LTE 網絡，並且不會加價。呢個 Plan 包一個本地號碼及無限接聽，一般手機 Plan 嘅留言信箱、來電顯示、多人會議、來電待接、來電轉駁都會包埋。呢個 $88 Plan 係免每月行政費!
有無伏位？
聽落好抵，係咪？其實都有伏位。好眼嘅網友，都見到係無限接聽唔係無限使用，即係呢個 Plan 只可以接電話，唔可以打電話，如果要包埋打到電話，只需每個月另加 $80，就有 2000 分鐘打出嘅通話時間。仲有，呢個限速 Plan 其實係 Corp Plan，乜叫做 Corp Plan，即係企業計劃，要用商業登記證登記，好似 ePrice.HK 呢 D 細公司，會比較容易申請到。仲有，呢個計劃係以限時優惠的方式推出，期間限定至 2016 年 4 月 30 日，要簽 36 個月合約，用家帳單必須在帳單發出日起計三十天內付款，如果客戶在最短合約期內提早終止合約，則需要支付 HK $500 的提早終止費用。
▲ 按圖可放大 Truphone 限時數據計劃的海報。有興趣朋友，可以再自己根據海報上面資料聯絡佢地嘅 Sales，一齊資料，都以佢地為準。
Lycamobile $68 / 10GB 容量
事先講明，版主唔係幫 Truephone 賣廣告，只係見到有優惠，又有人問，幫大家問清楚。與此同時，我都會介紹 Alternative 俾大家，就係 Lycamobile 儲值卡，其實版主之前介紹過，大家可以 Click 呢到重溫。可以講，佢地 $68 / 10GB FUP 無限上網計劃還存在的，用 3HK 嘅 3G 網絡。平還平，但注意不支援本地視頻服務如 myTV、Viu App 等等。之前，我地介紹過，Lycamobile 儲值卡，因為使用澳洲 IP，變相睇到 Netflix 澳洲版，裡面會有最新一季嘅 House Of Cards。不過，提提大家，因為 Netflix 開始封鎖 VPN，若你在觀看途中，轉為本地 WiFi，Netflix 會立即出警告唔俾你再睇，但若果你用番 Mobile Data，就沒有影響。10GB 數據，應該睇到好多集 House Of Cards。
來源：Truphone