泊車好幫手
有車嘅朋友如果要出去玩，咁最想知嘅當然係邊度有得泊車啦! 咁知道左邊度有得泊車都唔夠架喎! 例如喺一啲特別日子好似農曆新年咁，知道邊度泊車都未必知道有無位俾你泊! 呢個 App 可以幫你搜尋附近嘅停車場，並話你知個停車場仲有幾多個泊車位，如果個停車場無車位，咁你就可以直接去另一個仲有位嘅停車場，可以慳番唔少時間。另外，呢隻 App 亦可以透過自家研發的藍芽技術記錄泊車位置，唔洗擔心唔記得左泊左去邊。
▲ 在主頁上，你可以看到你附近嘅停車場、飲食等資訊，你亦可以在目錄上按泊車指南，查詢其他地區的停車場情況，就如右圖般，啟田新翼停車場尚餘 30 個車位，而舊翼停車場尚餘 51 個車位。
▲ 目前首階段只有 6 個停車場會利用這個 Beacon 嘅藍芽裝置，記錄泊車的位置。
▲ 該藍芽裝置會設置在停車場的天花位置。
▲ 就以上面嘅 Model 架車為例，在目錄中打開「查看泊車記錄」，然後按「記錄泊車位置」，咁就會顯示「正在定位中」，偵測完成後，你就可以見到你嘅停車位置。
飲食好建議
有時候想出街食飯，但唔想食黎食去都係果幾味，想睇下仲有邊度有好野食，咁呢個都幫到你。呢個 App 除左可以幫你 Search 到你附近有咩餐廳之外，亦都可以根據你想食嘅美食嘅類型，幫你去搵適合你嘅餐廳。
▲ 有兩種不同的搜尋方式，在目錄中按飲食指南，可以根據你選擇的地區搜尋合適嘅餐廳。而在目錄中按美食薈萃，就可以根據你喜歡嘅美食類型去搜尋合適嘅餐廳。
Shopping 好推介
如果你想行街 Shopping 買野，但唔知去邊好，呢個 App 可以幫你搜尋一下領展啲商場入面有咩野店舖，並可以根據你想買嘅野，例如時裝、家居用品等等，去選擇適合你嘅店舖。
▲ 目錄中有兩個項目：「購物熱點」及「購物指南」，一個係推介一啲購物好去處俾大家，另一個就根據你嘅需要去提供建議。
除左以上提過嘅功能之外，其實目錄中仲有活動及推廣功能，商場入面有啲咩野活動，你都可以第一時間透過手機 App 知道。例如樂富廣場而家有個萬聖節活動叫「恐怖心戰室」，你可以喺手機都了解活動詳情，考慮去唔去玩。另外，呢隻 App 亦有一個電子優惠劵嘅功能，相信將會提供一些購物或者飲食優惠給大家。
睇完以上對於「泊食易」呢隻 App 嘅介紹，你對於呢隻 App 有無興趣? 老實講，版主對呢隻 App 嘅興趣不大，呢隻 App 所提供嘅資訊全部都係同領展旗下嘅商場店舖有關，感覺上領展推出呢隻 App，話係為左方便大眾，但似乎「醉翁之意不在酒」，似係方便氹大家去領展嘅商舖度消費多啲。你地又點睇呢? 留言講下啦!
App 下載資訊
◎ App 名稱：領展泊食易
◎ 系統需求：Android 4.0.3 或以上
◎ 下載方式：Google Play