USB 線 x 掛飾 TUNEWEAR 機械人充電線登場!

左定坤 (Cho Ting Kwan) 2015-12-04 00:25 | 手機配件

而家啲手機配件真係愈出愈有創意，之前版主同大家分享過唔少創意產物，例如內置「尿袋」的皮帶、手機殼變 Wi-Fi 放大器等等，都是一些我地以前無諗過嘅概念。咁唔知你又有無諗過，就連平平無奇嘅叉電線都可以變得不平凡? 日本 TUNEWEAR 設計團隊推出一款以機械人為設計的充電線 Roboto，既可以用黎充電，又可以做掛飾，能夠實現「一物多用」。



Roboto 充電線是 TUNEWEAR CableArt 系列的新成員，該系列的充電線採用獨特的旋轉卡榫設計，可以將你嘅充電線扣落背包、褲頭或者鎖匙扣度，搖身一變變成一個時尚的掛飾。呢個設計同一般充電線的設計唔同，除左外型特別，改變線材收納方式之外，仲唔會令到條線容易打結。咁頭先講過，Roboto 充電線係會以機械人為設計，個機械人嘅主體採用左熱塑橡膠打造，以條充電線係用左尼龍包住，可以令佢更加堅固耐用。


▲ 唔用嘅時候可以做掛飾。


▲ 用嘅時候可以拆佢出黎，一物多用。

CableArt 系列的產品都通過左蘋果 MFI 認證，可以用喺所有支持 Lightning 線嘅蘋果產品上。版主覺得呢種嘅設計唔錯，掛喺個袋度或者鎖匙扣度，可以唔洗擔心自己唔記得帶叉電線，又睇得又用得，的確係唔錯! 不過如果能夠支持埋 Android 手機嘅話就好! 價錢方面，Roboto 充電線的建議零售價為 HK $199，有灰配黑、粉藍配紅兩款顏色選擇，唔知你會唔會對呢種產品有興趣呢?