平價 18:9 芒！最靚係藍色？紅米 5 Plus 開箱！
今代的紅米 5 Plus，包裝盒用上了鮮豔的紅色，相當搶眼。而當中的「5」字，亦放到大一大，好容易令人一眼就看出，這是紅米 5 Plus 的包裝盒。不過，包裝盒如何都不是重點，重要的是包裝盒入面部手機。紅米 5 Plus 具有 5.99 吋 FHD+ 亦即是 18:9 芒，正面睇其實外表並不比其他 18:9 芒手機差，不過一反轉機背部份，哎......依然係俾網友一種好膠的感覺。拎到機，版主 Keith 一望個機背，就覺得有種好 old 的設計。是的，我都認為機背設計係落伍左啲，不過在四款顏色 (金、黑、藍、粉) 之中，版主又覺得當中的藍色係幾靚的，不知網友又是否認同呢？唔講咁多，即刻開箱，睇相啦！
▲ 紅米 5 Plus 個包裝盒用上了鮮豔的紅色，面頭大大隻寫住個「5」，好易睇得出係「紅米 5 Plus」。
▲ 包裝盒背面寫上一些關於紅米 5 Plus 的基本配置，例如 5.99 吋全面屏、後置 1200 萬像素相機等等。
▲ 開箱！包裝盒內隨機會有 SIM 卡針、microUSB 線、火牛，以及一個透明保護套。
▲ 由於小米俾版主的紅米 5 Plus 是國內版的，所以跟機火牛會是雙腳頭。而雖然紅米 5 Plus 所用的 U 本身可以支持 Quick Charge 3.0，但紅米手機無開放呢個功能，都無辦法。跟機火牛最高輪出為 5V / 2A，亦即是 10W。
▲ 紅米 5 Plus 用上了 5.99 吋 18:9 屏幕，解像度為 FHD+，其實個芒就咁睇係幾靚嘅。
▲ 屏幕上方會有 500 萬像素前置鏡頭以及 Sensor。
▲ 另外可以留意到，紅米 5 Plus 用上了圓角的設計，呢一刻我就諗起 Sharp AQUOS S2 的切割，一比之下覺得紅米 5 Plus 呢個靚好多。
▲ 機背還是用上三段式天線設計，而版主 Keith 同我都覺得，紅米 5 Plus 機背的設計有點 out，不過我又咁睇，顏色部份呢隻藍又係幾靚嘅~另外，機背會有 1200 萬像素的主鏡頭以及指紋辨識鍵。
▲ 機背下方會見到有小米的 Logo。
▲ 手機左側會見到有 SIM 卡槽。
▲ 而右方則見到有音量鍵以及開關鍵。
▲ 機底會見到有 microUSB 插槽以及喇叭。
▲ 紅米 5 Plus 一共有四種顏色選擇，版主個人比較喜歡的，應該是我手上的藍色。
▲ 18:9 芒的手機好處就係機身夠窄，手感係不錯的。不過設計又真係...... 你鍾唔鍾意呢?
用 S625 處理器，有 4GB / 64GB，安兔兔跑分立即看!
紅米 5 Plus 同紅米 5 所用的配置係不同的，紅米 5 係用 S450 處理器 + 3GB / 32GB，而紅米 5 Plus 則係用 S625 處理器 + 4GB / 64GB，呢粒處理器在一年前已經出哂名好慳電，不過問題係 GPU 能力比較差，打高需求的 3D Game，會比較吃力。一部 $1099 用 S450，一部 $1499 用 S625，安兔兔跑分又相差幾多呢？即刻 show 俾大家睇下啦！
▲ 左邊是紅米 5 Plus，而右邊是紅米 5，其實從跑分上來看，兩部個成績都唔差太多，S625 處理器跑出成績為 60712 分，而 S450 處理器跑出的成績則為 55883。可以看到兩粒處理器都有一個共通點，就是 3D 效能都比較差，無話打唔到機嘅，但打啲高需求的 3D Game，就會吃力一點囉！另外，從上圖中都可以順便比較一下，5.7 吋的紅米 5 以及 5.99 吋的紅米 5 Plus，實際機身大小相差幾多。
小結
暫時先同大家做個簡單的開箱，稍後有時間的話，就可能會同大家做個電池測試。影相會唔會測試呢? 也許，但老實說，不要說紅米手機，就算小米的旗艦系列手機，影出來的相片都係唔多掂，更何況是一部千元紅米手機呢？所以，買得紅米手機，基本上都不會是為了影相，要影相靚就唔會買紅米。買得紅米，應該是為了平平地，滿足到一天的基本需要，最重要就要夠慳電，咁就已經好足夠。當然，如果未來一部紅米手機的相機，可以拍得住旗艦機的級數，咁實係最好不過，但你覺得可能嗎? 難！對於呢部紅米 5 Plus，網友又點睇呢？紅米 5 Plus 在文章發表時，建議零售價為 $1499，按這裡有詳細規格及最新賣價。
