▲ 跟機配件相當陽春，除左 OTG 線同埋 USB 線之外乜都無，充電插頭都要自行另外買⋯⋯
香港行貨中港聯保， 原生已經有 Goolge Play Store ！
首先要提係台電呢部 X98 Air 3G，係有香港代理，買機有保養一年，仲有中港聯保，大家係入手時就唔需要太擔心買左之後會無保養。另外因為 X98 Air 3G 係香港行貨，所以預載左 Google Play Store ，大家都唔需要擔心 download apps 會有麻煩。深水埗鋪頭用 $2,199 去賣呢部機，與同級規格的 3G Android 平板價錢相比是稍為貴一點的。再講講 X98 Air 3G 嘅外型，簡單來講都係一貫大陸平板傳統，外型非常之咁 iPad ，又係拎出街會令人誤會果隻，同 iPad Air 一樣係用左金屬機身同埋 9.7 吋屏幕。比較可惜係前置鏡頭偏左同埋無 Home 鍵，可能因為咁外國媒體無選到佢做最完美山寨 iPad Air。不過，重量上 X98 Air 雖然就無 iPad Air 咁輕，重 498g ，但拎上手感覺並唔算好重。
▲ 行貨台電 X98 Air 3G 係包裝盒的右上角會有行貨認證貼紙，想入手朋友要留意。
▲ X98 Air 預載左 Google Mobile Services。另外 X98 Air 可以用來打電話 ( Android Mode) 。無論 Windows 定 Android 都可以連接 3G 網絡。
▲ 不論係正面定背面， X98 Air 3G 對 iPad Air 的「致敬」程度都相當高！
▲ SIM 卡同 microSD 卡槽都位於機背的右手邊，另外機底亦有 micro HDMI 插頭，屬於大陸平板標準配置。
▲ 作為一部抄得似做得足的山寨平板， X98 Air 3G 係屏幕方面規格亦都同 iPad Air 睇齊，一樣係用上 9.7 吋 2048 x 1536 IPS Retina 屏幕，比例亦跟足 iPad Air 係 4:3 。版主試用 X98 Air 3G 上網時就覺得睇字體同圖片表現都算唔錯，而可視角度亦都算高，整體表現是可以的。屏幕細緻度來講算係細緻，文字的銳利度很不錯，而可視角度亦算出色。
支援 Android + Windows 8.1 雙系統！32GB 容量拆開兩邊、不能「一鍵切換」！
雖然話 X98 Air 係行雙系統，但要留意佢唔支援「一鍵切換」，即係開機時大家可以選擇用 Android 定係 Windows ，但係當選擇左其中一個系統後，用家如果想轉去另一個系統時就需要重新開機先可以做到。另外 X98 的 Android + Windows 雙系統實際上係獨立運作，並無互通性。版主嘗試過係 Android 系統時影相，之後進入 Window 系統時就搵唔返係 Andorid 系統影的相片，對雙系統有興趣的朋友就要留意。另外，相信好多朋友都會想知究竟呢部平板行雙系統所佔的內置容量會唔會好多，版主相信台電實際上係將 X98 Air 的 32GB 內置容量分割成兩半比兩個系統使用，所以係 Android 方面一開始就只有 5.78GB 可用，反而係 Window 系統查看剩餘內置容量時就仲有接近 10GB 。但整體來講其實兩個系統剩餘內置唔算多，好在 X98 Air 係支援最大 64GB 的 Misco SD 插卡，版主就會建議大家如果想入手最好插返張 SD 卡啦！
▲ 開機時要先決定選擇進入 Android 或者 Windows 系統，如果用家唔選擇就會自動進入 Android 。
▲ Android 內置容量只有 5.78GB ， Windows 系統裡面剩餘內置容量比 Android 系統裡面多少少，有 9.72GB 。
Android 方面仿 iOS 平板風格！Windows 8.1 原生已有 Office 360
係 X98 Air 的 Android 系統方面，首先以介面來講台電真係真係做足功夫，「參考」 iPad Air 程度相當高，除左跟足大部份大陸牌子介面一樣無 app drawer 之外，連 icon 風格都用上 Flat Design ，實在令牌主幾佩服⋯⋯而係 Window 方面，相信大家最關心主要都係兩點，究竟 X98 Air 係行 Windows 8.1 的情況下會否太慢同埋佢可唔可以用到 Office 呢？版主試用 X98 Air 的 Windows 系統時間並唔算好長，整體使用感覺來講雖然唔算好慢，但同行 Android 系統相比 X98 Air 行 Windows 時又真係會有點 lag ，但尚算係可接受範圍內。另外， X98 Air 係可以免費使用 Office 的，不過需要用家網上登記再下載返 Office 啟動軟件。雖然係煩少少，但用到 Office 就總算 ok 啦！
▲ 驟眼睇，可能大家真係會將 X98 Air 介面當成係 iPad ，而係 Andorid 系統版本方面，X98 Air 就用緊 4.4.4 。
▲ 留意啦！Office 過左 15 年 7 月就唔可以兌換，而 X86 Air 所行的 Windows 係 8.1 版本。
安兔兔跑分接近 S800 水準！玩 3D 遊戲方面略為不足！
係效能上，台電 X98 Air 用上 Intel Atom Z3736F 2.16GHz 處理器同埋 2GB RAM。用過安兔兔、 Quadrant Standard 同埋 Basemark 2.0 測試之後，大致結論就係整體表現普通，並唔太並亦算唔上出色，同 Qualcomm 處理器相比大約係比 S600 系列好少少但稍為唔及 S800 ，而係 3D 表現方面會比較弱。但純以使用時體驗來講， X98 Air 其實又算係唔錯的，起碼上網時都叫順暢，反而開機進入系統時頗為慢，無論進入 Anroid 或者 Windows 都要接近 分半鐘去 「Boot 機」，實在令人有少少燥底⋯⋯
▲ 係安兔兔上面， X98 Air 分數介乎 G3 同 HTC One 之間，而 Quadrant Standard 就有 15643 分，亦即係 X98 Air 係成績上係未達到 Qualcomm S800 系列處理器的水平。
▲ Basemark 來講，未達到 30fps 其實意味係 X98 Air 上玩大型 Android 3D 遊戲會稍為吃力。
版主小結：雙系統旨在搞噱頭， $2199 有行貨你買唔買？
今次試玩的台電 X86 Air 3G 雖然係外型上同 iPad Air 最少有 8 成似，但造工整體來講都同大陸廠牌出品質素差別其實唔大。效能表現上可能因為版主本身要求都唔係好高，所以覺得尚算係唔錯。反而問題主要落在 X86 Air 3G 主打的雙系統上，坦白講行雙系統但要重新開機先可以切換真係頗為不便，更重要係其實 X86 Air 3G 係行 Windows 系統方面雖然表現未至於不能接受，不過流暢度要跟 Surface Pro 等採用 Intel I5 處理器的平板當然就冇得比，但係同 PiPo W4 等國牌平板去比？其實反應都差不多，要用 Office 做簡單文書處理還好，但做要求效能較大的 task 真係會有難度，反正 Android 都可以做到簡單 Office 既工作，雙系統時感覺實在有點雞肋。但從另一角度來講， X86 Air 3G 一方面係行貨有保養而且又唔似得大陸水貨平板欠缺 Goolge Play Store 兼且有 3G 又可以打電話，純以一部 Andorid 平板來講有以上優點其實仍係有吸引力的，大家又認為比 $2,199 呢個價錢去買一部雙系統平板，會唔會吸引呢？
查詢: K Digital 27299881