復古 + 五軸防震 + 八千萬像素! Olympus PEN-F 版主上手扮文青!

左定坤 (Cho Ting Kwan) 2016-01-27 18:45 | Olympus

相信唔單止係版主，有唔少網友揀相機的時候，除左睇佢個 spec 之外，仲會睇埋佢嘅外型。但其實而家部部相機的外型都差不多款式，都唔係真係有好多相機個樣可以吸引到我。然而，今日 Olympus 在香港推出的 PEN 系列可換鏡頭相機新成員 PEN-F，就偏偏吸引到版主。呢部 PEN-F 其中一項最特別的地方，在於佢參照左經典相機的造型，俾到人一種復古、懷舊的感覺。難得遇到一部我感興趣的相機，版主當然要第一時間同大家分享一下呢部相機的外型，並用左呢部相機在會場上影左幾張相片，俾大家一齊感受一下呢部機的美啦!



繼承半格相機 PEN F (1963) 外型，採取復古風格
Olympus PEN-F 機身設計沿用左舊時旁軸菲林相機的風格，繼承左 Olympus 於 1963 年推出半格相機 PEN F 嘅古典外型，機頂由鎂金屬製造，並附有由鋁金屬研磨加工以及鑽石切割處理的模式轉盤、前／後轉盤以及曝光補償轉盤。而相機的前方亦有一個創意轉盤，用家可按個人拍攝風格自行調校單色或者彩色配置控制內的色調、飽和度等，模擬經典黑白菲林以及彩色菲林的效果。Olympus PEN-F 的機身尺吋為 124.8 x 72.1 x 37.3 mm，淨機身重量為 342g，有黑、銀兩種顏色選擇，配備 3 吋 103.7 萬像素的多角度觸控 LCD 顯示屏，並內置 236 萬像素 OLED 電子觀景器。另外，PEN-F 跟機會連 17mm f/1.8 光圈的 kit 鏡。電池方面，Olympus PEN-F 採用了 BLN-1 鋰離子充電池，大約可以影到 320 張照片或者最多 140 分鐘的影片拍攝。


▲ 今次版主上手的是這部黑色版本的 Olympus PEN-F，老實講，版主覺得銀色版本靚仔好多。Olympus PEN-F 將會配備 17mm f/1.8 光圈的 kit 鏡。


▲ PEN-F 是 Olympus 第一部數碼相機加入單色配置控制及彩色配置控制功能，透過相機前方的創意轉盤，用家可以按個人拍攝風格自行調校色調、飽和度等，模擬經典的黑白菲林和彩色菲林的效果。而呢個創意轉盤，就位於圖中鏡頭旁邊上方。


▲ 呢部 PEN-F 不愧係一部專業級的數碼相機，所以你可以見到，佢嘅按鍵都比較多同埋複雜。從機的背面我地可以見到功能鍵、INFO Display、ISO 等按鈕，而 Fn1/Fn2 按鈕係俾用家自行設定其拍攝功能。另外，你可以見到左上會有個電子觀景窗。


▲ 同時備有多角度觸控 LCD 顯示屏，水平旋轉角度為 270 度，垂直旋轉角度則為 180 度。




▲ 機的右側會見到有 HDMI 以及 USB 插槽。


▲ 而機的左側除左喇叭之外，就無其他特別。


▲ PEN-F 的頂部會有開關鍵、熱靴、拍攝模式轉盤、曝光補償轉盤、錄影鍵等等。(如圖)


▲ 而機的底部則可放置電池及 SD 卡。


▲ 電池方面，PEN-F 採用了 BLN-1 鋰離子充電池，能夠拍攝約 320 張照片及最多 140 分鐘的影片拍攝 (不使用變焦及其他操作功能)。


▲ 有黑、銀兩種顏色。個人比較中意銀色的版本。


▲ 版主上手呢部 PEN-F，由於重量就算連埋電池記憶卡都係得 427g，所以拎上手唔會好重，而且手感亦都唔錯。

會場內試相速測
Olympus PEN-F 採用左最新研發的 2000 萬像素 Live MOS 感光元件，結合 TruePic VII 影像處理器，加強 PEN-F 的解像力。另外，PEN-F 內置由 VCM 音圈摩打驅動的 5 軸影像穩定系統，連同高解像力的 M.Zuiko 鏡頭，適合在手持拍攝的同時，拍出高質素的相片和影片。另外，PEN-F 內置高解像度拍攝模式，會連續擷取 8 個影像，其防震系統會將感光元件平移 0.5 個像素，拍出一張 5000 萬像素的高解像度 JPEG 相片或者 8000 萬像素的 RAW 影像。不過經版主向職員了解，原來呢個高解像度拍攝模式，一定要使用腳架，先可以拍出咁高像素嘅照片。另外，Olympus PEN-F 採用了 FAST (Frequency Acceleration Sensor Technology) 自動對焦技術，結合 M.Zuiko Digital 鏡頭，能夠提升自動對焦的速度﹐支援最高 1/8000 秒的機械快門，並使相機的快門釋放時滯縮短至 44ms。PEN-F 亦提供高達 5 級快門修正補償效果，就算在低光環境下手持拍攝，都可以影到清晰的影像。

講左咁多 spec 方面嘅野，係時候要俾大家睇下呢部機的拍攝效果。由於版主只是在場上極速試拍，所以大家唔好期待會有好靚的風景相，不過大家可以藉着呢個機會，睇下呢部相機影出黎的照片係點。

普通拍攝 (沒有使用高解像度模式)










高解像度模式

▲ 咁頭先都講過，PEN-F 具備高解像度模式，意思即係連續拍下 8 張照片，結合成為一張 5000 萬像素的 JPEG 檔。不過版主沒有帶腳架喺身，所以只能將部 PEN-F 放在枱面上，幫助固定。但即使將部相機放在枱上固定，喺你按下快門果下其實都會有少許震動，所以建議採用 Wi-Fi 遙距拍攝，才能達至最佳的效果。不過如果你試下將張相放大黎睇，你會見到張相影出黎真係相當清晰。

小結
呢部 Olympus PEN-F 未在香港發佈之前，版主已經對呢部相機感到有點興趣，原因無他，只因佢的外型設計獨特，顯得比較 High Class。而今日在發佈會上有幸試玩呢部 Olympus PEN-F，更是令我深深感受其復古、懷舊的味道，對於外型來說，版主對呢部 PEN-F 感到非常滿意，如果 10 分滿分，版主我真係會俾佢 9 / 10 分。至於在試拍方面，現場環境比較昏暗，受到環境的限制，所以可以俾大家睇到的成像都有所規限。不過，如果以相對昏暗的環境來說，呢部 PEN-F 影出黎嘅照片尚算不錯，對焦都好快好準確，尤其是開啟高解像度模式之後，影出黎的照片更是非常清晰。可惜版主今天沒有帶備腳架，如果唔係其清晰度應該會更加明顯。至於售價方面，按這裡有關於 Olympus PEN-F 的售價詳情。唔知大家對於呢部相機有無興趣呢?

在文章刊登時，Olympus PEN-F 的建議零售價為 HK $12990，按這裡有詳細規格及最新賣價。