外型跟上代相若，在多方面進行優化
Sony A6300 在外型上同上一代相比，基本上可以話係近乎一樣，但機身就比上一代略厚，而且在鏡頭接環、快門按鈕、模式轉盤等地方亦進行了優化。A6300 的機身尺寸約為 120.0 x 66.9 x 48.8 mm，淨機身重量為 361g，拎上手並不會覺得好重，而且機身會有「握手位」，方便單手拍攝。A6300 機身採用了堅固的鎂合金設計，配上 9 枚自訂按鈕，可設定多達 64 種不同功能，並配備了 3 吋闊、92 萬點的 LCD 顯示屏 (非觸控屏)。另外，A6300 配備 XGA OLED Tru-Finder 電子觀景器，解像度高達 240 萬點，比上代高出差不多一倍，而且具有高對比度，讓畫面更清晰，而觀景器的幀率亦提升至每秒 120 幀 (可調校)，使動作畫面更流暢。
▲ 可以見到 Sony A6300 體積小巧，相當輕便。
▲ 從正面來看，外型同上一代差不多，如果將 A6000 同 A6300 擺埋一齊，未必咁容易分得出邊部打邊部。Sony A6300 機身具有「握手位」，就算單手拍攝都無難度。
▲ A6300 具有高達 240 萬點高解像度的電子觀景器，比上一代多出差不多一倍，配備了 3 吋闊 TFT 顯示屏。另外，你可以見到基本相機功能都相當齊全，例如閃光燈、預覽鍵、ISO 等等。
▲ 機身側面可以見到有 microUSB 插槽、HDMI 迷你連接埠 (Type-D)，以及上方會有 Wi-Fi 的圖示，代表 A6300 能夠支援 Wi-Fi 無線連接。另外，你可以從圖中見到，A6300 的顯示屏是可調節角度的，最多可以向上翻約 90 度，或者向下反 45 度。
▲ 而另一側則可以見到有 NFC 的圖示，而轉彎位會見到有錄影鍵。
▲ Sony A6300 具備熱靴、閃光燈、快門鍵、自訂功能鍵等等。
▲ 左上方會見到有 A6300 以及 4K 的字樣，即係話呢部相機係可以支持 4K 攝錄。
▲ A6300 亦將右上方的模式轉盤作出優化。
▲ A6300 內建閃光燈，只要按下閃光燈的按鍵，佢就會自動彈出。
▲ 同一般相機一樣，A6300 的底部是放置電池以及 SD 卡的地方，而且可以裝上腳架。
▲ 機仔細細又可以換鏡頭，去旅行觀光真係啱哂!
對焦放大鏡功能，確認對焦的銳利度
Sony A6300 具備「對焦放大鏡」功能，呢個功能版主覺得值得同大家提及一下，呢個功能有乜野作用呢? 「對焦放大鏡」能夠將 LCD 屏幕顯示影像的特定範圍放大，讓你可以確認對焦的銳利度。只要到 MENU 入面拍攝功能的第 6 頁，選取「對焦放大鏡」，咁你就會見到出現一個橙色的方格，按左右選擇你想放大的位置，再按 set，然後你就可以將影像放大 5.9 倍。5.9 倍已經是極限了? 咁問得當然唔係啦! 只要你再按多一下 set，就可以進一步放大至 11.7 倍，你可以見到屏幕由原來橙色的方格，變成了一個灰色十字型的圖示，只要你將灰色十字型圖示調整到你想對焦的位置，就可以針對該位置進行對焦拍攝，而且可以讓對焦更準確。
▲ 按 Menu，在拍攝功能表的第 6 頁，你會見到有「對焦放大鏡」的功能。
▲ 選取「對焦放大鏡」之後，你就會見到出現左一個橙色的方格，呢個方格可以讓你選擇你想放大的位置。
▲ 選擇左之後按 SET，就可以將影像放大至 5.9 倍，如果你再按多次 SET，係可以放大至 11.7 倍。然後在屏幕上你會見到由原來的橙色方格，變成了一個灰色的十字圖案，呢個十字圖案係俾你選擇你想對焦的位置。
425 個對焦點，0.05 秒極速對焦
Sony A6300 配備了 4D FOCUS 對焦系統，結合相位檢測及對比檢測系統，能夠以最快 0.05 秒精確捕捉及鎖定快速移動目標。A6300 其中一個最強大的地方，在於它配備了全球最多 425 個相位檢測自動對焦點，而呢 425 個自動對焦點密集地覆蓋在整個影像畫面上，在進行單張拍攝的時候未必咁明顯感受到，但在進行連拍、甚至是拍攝影片時，你可以感受到它的對焦速度，而且會隨着拍攝主體的移動而有所改變。光從文字上係好難話到俾大家聽係點，所以版主就為大家示範一下，到底點樣快速地追住移動主體對焦。
▲ 經測試之後，發現也許是主體移動速度太快的關係，A6300 所辨識到的主體會不斷地改變，但唔知你能唔能夠感受到佢的對焦速度呢?
Sony A6300 初試牛刀
Sony A6300 具備全新研發 2420 萬像素 APS-C Exmor CMOS 影像感測器，配合 BIONZ X 影像處理器，相較上代大幅提升相機的整體表現。全新的影像感測器加入了銅線設計，可增加收集光線的效率及大幅提升輸出速度，而 BIONZ X 則配備進階影像處理運算，能夠將感測器功能發揮至最佳狀態。另外，A6300 的 ISO 感光範圍為 ISO 100－51200。由於場地限制關係，版主只能利用 A6300 就現場的環境，即時試拍幾張相，俾大家睇下影出黎的效果如何。
小結
上手 Sony A6300 之後，發現雖然機仔細細，但其性能相當強大，是 Sony 近年推出一部不錯的相機。然而，版主覺得呢部 A6300 如果將佢設定為 AUTO 模式的話，影出黎嘅相會比較暗，所以如果想影得好，一定要靠手動模式，自行調整感光度、白平衡、曝光補償等設定，但如果下下一定要靠全手動的話，又未必太適合初學者使用，因為 A6300 的操作其實都有點兒複雜，如果一個未學過影相的用家使用，可能會覺得好混亂。唔知大家又點睇呢? 你地又對呢部 A6300 有無興趣?
在文章刊登時，Sony A6300 的建議零售價為 HK $7990，按這裡有詳細規格及最新賣價。