兩個雙記憶卡版本，上手感比較重
雖然說 Nikon D5 是 D4s 的後繼機款，不過版主可以告訴大家，D5 與 D4s 之間是兩個完全不同的概念。據 Nikon 官方稱，D5 是 Nikon 有史以來最強的相機型號，特別在其對焦、感光度以及連拍方面。有關連拍，版主稍後會示範俾大家睇，而家就先講下呢部 D5 的外型以及上手感。初初拎起呢部 D5 的時候，版主對呢部 D5 的第一印象是：好重、好墜手。D5 的機身尺寸約 160 x 158.5 x 92 mm，淨機身重量為 1235g，呢個重量如果對於男士來說不算甚麼，但如果是女士用的話，就會相對比較吃力。
Nikon D5 具有雙記憶卡插槽，一共有兩個版本，分別為雙 XQD 卡以及雙 CF 卡。版主今日上手試的是雙 CF 記憶卡版本，作為一部專業級的單鏡反光相機，我們可以看到 D5 的機身上擁有很多按鍵，比較複雜，並不太適合初學者使用。D5 具備 3.2 吋 235.9 萬點高解像度 LCD 觸控屏，而且系統內置虛擬鍵盤，方便打字。你可能會問，一部相機做乜無啦啦要打字呢? 並其實之所以要打字，係因為你可以自訂相片檔案名稱等等，例如預設的相片名稱是 DSC_XXXX，你可以自行修改為 D5_XXXX 之類。
▲ Nikon D5 的正面圖，你可以見到個外型望落都幾「大舊」，機身偏長。要注意的是，Nikon 職員表示 D5 本身係唔跟鏡頭的，所以你可以自行選購適合自己的鏡頭，以上呢個鏡頭只係 for Demo。
▲ 從正面來看，D5 的右邊會有一個「握位」，讓拎上手時更穩陣，而且更舒服。
▲ 相機的上方，我們可以看到有開關、快門、ISO、錄影等功能按鍵。
▲ 我們亦可以按個人需要，設定拍攝模式、曝光包圍等功能。
▲ D5 同時亦具有熱靴，能夠裝上外置收音咪、外置閃光燈等配件。值得注意的是，D5 並沒有內置閃光燈。
▲ 由於 D5 是一部專業級的單鏡反光相機，所以在機身上我們可以看到有很多複雜的按鍵，如 AF-ON、MENU、縮放等等。
▲ 你可以見到有個位置係可以揭開，揭開之後會見到入面有個按鍵，你估下係乜野按鍵黎?
▲ 答案就係，當你按下果個按鍵之後，就能夠打開雙記憶卡插槽。
▲ D5 的側面會有 Mic 孔以及 USB 插槽，並支援 HDMI 輸出。(咁最底果個係乜黎架呢?)
▲ 果個其實係一個鎖黎，只要你向左轉，就能夠打開電池部份。
▲ D5 同上一代 D4s 一樣，同樣使用 EN-EL18a 鋰電池，雖然用緊同一舊電，不過 Nikon 表示，相片的連拍張數比上一代還要多，續航方面可以連續拍攝超過 8000 張。
▲ 底部其實無乜野好講，可以裝上腳架，完。
▲ 你可以選擇畫面大小以及每秒幅數，最高可以有 3840 x 2160 解像度以及 30p。
▲ D5 標準 ISO 感光度有 102400，並且可以擴展至 Hi 5 (相等於 ISO 3280000)。
▲ 在功能表中，用家亦可以設定自動對焦、測光/曝光、計時器等等。
▲ D5 內置虛擬鍵盤，用途可以係更改相片檔案名稱，不過在一個 3.2 吋的屏幕上打字，版主覺得始終係太細，打字時比較容易按錯。
▲ D5 機身比較重，拎上手會有點墜手。(辛苦哂 Model 姐姐拎咁耐了
)連拍速度版主實測
Nikon 表示在 D5 身上落左好大苦功，同上一代 D4s 相比，並不是同一個概念。D5 採用了 Nikon 自家研發的全新 FX 格式 CMOS 影像感應器，棄用 D4s 的 EXPEED 4 影像處理引擎，並配備了最新的 EXPEED 5，相比上代有很大進步。D5 採用了 2,080 萬像素感光元件，最高標準 ISO 感光度達 ISO 102400，而且更可以擴展至 Hi 5 (相等於 ISO 3280000)。另外，Nikon 支援每秒約 12 張的連拍速度，單次連拍更多達 200 張 12 bit 無損壓縮 RAW 影像。雖然 D4s 支持每秒 11 幅的連拍速度，D5 僅比 D4s 每秒多一張，但 D5 升起反光鏡之後，拍攝速度更高達 14 fps。Nikon 亦在 D5 上提升了連續快門與反光鏡機制的速度，並大幅減少了觀景器在單次高速連拍期間出現黑屏現象。就咁講好空泛，到底 D5 連拍點快法，黑屏現象點樣減少? 即刻去片感受下!
▲ 版主手持 Sony Xperia Z5 Premium，將手機鏡頭對準 D5 的觀景器，然後長按快門鍵進行連拍，你可以感受其連拍的速度，並且看到黑屏的時間好短。
小結
由於受時間所限，版主無辦法即場詳細試到好多，只能從基本的外型、連拍方面進行評測及示範。事實上，版主我之前未用過 Nikon 的單反相機，今次都係我第一次上手 Nikon 的單反，老實講，雖然呢部 D5 價錢唔平，但其實我覺得都值。版主我本身用緊 Canon 700D 入門單反，開始覺得 700D 未能滿足自己的需要，早就想換部新機，所以今次上手 D5 之後，確實係深深吸引到我，除左 D5 能夠支持高速的連拍之外，其極高 ISO、低至 -4 EV 的 AF 感光，亦能夠讓我即使在昏暗的環境下，都可以影到高質的相片 (點解我會知? 因為 Nikon 在會場上放左幾張用 D5 拍出來的作品，有些場景更是光源較少，但即使在沒有閃光燈的情況下，依然能夠拍到清晰的相片)。不過，吸引歸吸引，版主雖然話呢部相機值得呢個價錢，但講到底我都係死窮鬼一個，所以只能現場 J 下就算。唔知網友們覺得呢部 D5 吸唔吸引呢?
▲ Nikon 在發佈會現場展示、用 D5 拍出來的作品。
在文章刊登時，Nikon D5 的建議零售價為 HK $49,800，按這裡有詳細規格及最新賣價。