CASIO EX-TR70 外觀上延續左過往 TR 系列的風格，都是採用左旋轉外框設計，方便扭動屏幕同埋鏡頭向唔同角度自拍。另外，EX-TR70 的機身採用了金屬材料鑄造，運用鋁材切割技術，呈現出其菱形的紋理。EX-TR70 的機身尺吋為 128.5 x 60.9 x 16.3 mm，淨機身重 128g，在外觀上以輕巧纖薄為主要賣點。而機身顏色方面，EX-TR70 有金色、桃紅和白色三種選擇。
▲ EX-TR70 有三種顏色選擇，分別為金色、桃紅、白色三種。
▲ 首先要說明一下，EX-TR70 的屏幕能夠進行左右旋轉的，而外框亦可以上下旋轉，方便大家進行多角度的拍攝。
▲ EX-TR70 的上方會有個圓形的鏡頭，鏡頭四周可以清晰見到佢嘅菱形紋理，感覺上好似寶石咁。鏡頭的左邊，你見到有個發光的位置，呢個唔係我相機的閃光燈，而是呢部機內置的補光燈。而下方則有 CASIO 的字樣。咁呢部相機係專為女士們設計，如果以一個男士的角度拿起呢部機，感覺上有少許奇怪。
▲ 可能上圖唔夠清晰，其實 CASIO 字樣的下方，仲隱藏住一個快門鍵，輕按能夠對焦，大力按能夠拍攝。
▲ 咁版主上手的是一部桃紅色的 EX-TR70，機背除左可以見到佢嘅顏色之外，仲可以見到 EXILIM 的字樣，而上方則有揚聲器一個。
▲ 至於機的頂部，會見到有個開關鍵。版主試過，從關機至開機，只需 1 秒左右。
▲ 而機的底部能夠讓你扣上吊飾。
▲ 機的左側其實咩都無，而下方你會見到 MADE IN JAPAN 的字樣，大家可以相對更放心地使用。
▲ 而機的右側下方會見到有個 USB 插槽。
▲ 機的右側上方，就會有個 OPEN 的按鍵，只要按下佢，就能夠打開背蓋。
▲ 打開左背蓋之後，你會見到佢舊電，係採用左 NP-150 充電式鋰電池，能夠拍攝約 50 分鐘的影片以及約 220 張的靜態影像，感覺上續航能力並不太理想。
咁其實 TR 系列嘅相機都出左幾代，咁到底今次呢部 EX-TR70 同上一代嘅有啲咩野唔同呢? 首先，在屏幕上 EX-TR70 較上一代有所升級，今次 EX-TR70 將會採用 3 吋 92 萬像素 IPS-NEO 輕觸式液晶顯示屏，能夠提高其對比度，亮度亦比上一代光差不多 1.5 倍，令到屏幕的顏色更均勻，而且屏幕的可視角度做得不錯，在任何角度睇落去，影像都很清晰可見。而在功能上，CASIO 稱曾對外做過市場調查，得出結論是「粉嫩」比較適合女士，因此今次嘅 EX-TR70 亦都新增了「粉紅嫩肌」美顏模式，並具備 12 級美白或古銅膚色及平滑肌膚軸。同時，EX-TR70 亦都新增了「一鍵拍攝」功能，能夠更方便快捷地進行錄影。最後，通常大家影完相都可能會有 share 上 Facebook 或者 Instagram 的習慣，EX-TR70 亦新增左「自動傳相」功能，影完相自動 send 到你手機度，省卻左好多繁複嘅步驟。
▲ EX-TR70 將佢嘅屏幕升級左，採用3 吋 92 萬像素 IPS-NEO 輕觸式液晶顯示屏，就算係側面望落去，都仲可以睇得清晰。
▲ 根據 CASIO 發佈會現場的介紹，用 EX-TR70 自拍，影出黎的影像會比上一代 EX-TR60 拍出黎嘅更加紅粉菲菲，好似塗左胭脂咁。
▲ EX-TR70 新增了「粉紅嫩肌」美顏模式，並具備 12 級美白或古銅膚色及平滑肌膚軸。
▲ 你可以將 EX-TR70 連接至手機，之後就可以設定自動傳送照片，方便你即時 share 上社交網站同朋友分享。
▲ 值得一提的是，EX-TR70 內建不同的拍攝模式，包括「自動模式」、「專業模式」、「美顏模式」、「Selfie Art」等等，能夠為你的自拍加入不同的特色風格。
規格方面，EX-TR70 採用了 1/1.7 吋高感光度 CMOS、1100 萬有效像素以及 21mm 超廣角鏡頭，採用了 EXILIM HS 第三代雙核心影像處理器，能夠快速地處理影像，達至約 1 秒的高速啟動、約 0.24 秒的拍攝間隔、約 0.23 秒的自動對焦時間以及無間隔快門。同時，EX-TR70 具備「智能美顏 BKT 包圍式曝光」、「Selfie Art」、「Selfie Pad」、「揮手自拍」等模式，並支援全高清影片錄製。另外，EX-TR70 具備高亮度閃光燈，能夠在陰暗的環境下進行補光。
好了! 介紹完咁多，能夠睇到最後嘅，應該係對呢部機都有啲興趣嘅人，你地最關心嘅，一定係佢嘅價錢方面。睇番上一代 EX-TR60 的價錢，EX-TR60 剛推出的時候定價為 HK $9980，差不多成萬蚊。今次呢部 EX-TR70 在價錢上比上一代有所下調，定價為 HK $7880，其實以一部數碼相機黎講，版主覺得都係有點昂貴。至於 EX-TR70 香港開賣日期未知，不過版主向相關同事詢問過，估計將會在今星期尾或者下星期便會開賣。不過唔少人都係愛美，呢部相機自拍功能咁強大，唔知美女們會唔會願意花錢去入手呢部相機呢?
在文章刊登時，CASIO EX-TR70 的建議零售價為 HK $7880，按這裡有詳細規格及最新賣價。