Casio EX-ZR3600 其實是 EX-ZR3500 的小升級，除左顏色選擇不同之外，另外仲有三大重點升級。在外觀上，Casio EX-ZR3600 延續了 Selfie Cam 自拍相機系列的風格，外型跟一般的數碼相機仔一樣，機身尺寸為 108.3 x 61.5 x 36.7，淨機身重量為 209g，配備掀背式 3 吋高清顯示屏以及自置快門，能夠讓自拍更方便。要注意的是，雖然而家有好多相機都引入了 Touch Screen 的技術，但係 EX-ZR3600 係無 Touch Screen 的！唔知呢樣算唔算係呢部相機的缺點之一，如果用慣有觸控屏的相機，突然用番呢部 EX-ZR3600 會相當不習慣。另外，Casio EX-ZR3600 有白色、桃紅色以及粉紫色三種顏色選擇，同上一代相比，你可以明顯感覺到今次推出的顏色更加女性化，可見 Casio 有意將該系列的相機推向女性市場。
▲ 版主覺得白色機款比較中性，男男女女都適合。
▲ 除左白色之外，今次 EX-ZR3600 新增的兩種顏色－粉紫色及桃紅色就明顯比較偏向女性化。
▲ 版主上手試的是粉紫色的 Casio EX-ZR3600。EX-ZR3600 提供 12 倍光學變焦，鏡頭結構為 10 片 9 組 (包括非球面鏡片)，配備 1276 萬像素、1/1.7 吋高速 CMOS 感光元件，光圈值由 F2.8 (W) 至 F6.3 (T)，而焦距範圍由 5.4mm 至 64.8mm，大約相當於 35mm 底片系統的 25 至 300 mm。左下方你會見到有個圓形的按鍵，呢個按鍵讓你掀開屏幕自拍的時候，可以當作快門鍵，而左上方則有內建的閃光燈。
▲ 機背方面，你會見到有一個 3 吋的高清顯示屏，再提醒多大家一次，呢個顯示屏唔係 Touch Screen 黎! 唔好成日手痕走去篤個 MON (其實版主係自己提醒緊自己
)。老實講，版主我自己其實都用緊一部 Casio 的 EX-10，個芒有 3.5 吋，今日忽然睇番呢部 EX-ZR3600，有點睇唔慣咁細......機背部份除左會有錄影鍵、播放鍵、功能鍵之外，另外仲會有一個 Wi-Fi 連接鍵，由於同大家提過，EX-ZR3600 會新增左一個「即時分享 One Time Share」功能，可以將相片製成 QR Code，即時分享俾你嘅朋友，版主稍後會為大家簡單示範一下。
▲ Casio EX-ZR3600 配備掀背式的屏幕，最多可以上揭 180 度。
▲ 呢邊係乜都無嘅，所以都無乜野可以講。
▲ 而另一邊就有個揭蓋，打開之後會見到有 HDMI 以及 USB 插槽。
▲ 機的頂部會有開關鍵以及快門鍵，並且能夠自行調整縮放率以及拍攝模式。
▲ 當中的拍攝模式同一般的相機差不多，來來去去都係手動、光圈先決、快門先決等模式，有影開相嘅應該對呢啲拍攝模式不陌生吧?
▲ 機的底部則可以放置電池以及 SD 卡。
▲ EX-ZR3600 體積其實並唔係好大，就算版主成日話自己手細，但拎上手手感都係不錯的。
▲ 你睇下 Model 姐姐拎住呢部 EX-ZR3600 自拍得幾自然? 你可能會問，點解佢會咁樣舉高隻右手呢? 係咪擺緊 Pose 呢? 其實唔係! EX-ZR3600 內建揮手自拍功能，你只需要對住鏡頭揮手，掣都唔洗撳就可以自拍，好似都幾方便咁。不過版主我點都要講一講嘅係，雖然呢個揮手自拍好似好正咁，不過版主我在自己的 EX-10 上試過，好多時我無揮手，但佢都無啦啦影左相，唔知呢個情況在 ZR3600 有沒有得以改善呢?
「即時分享 One Time Share」新功能示範
「即時分享 One Time Share」是 Casio EX-ZR3600 其中一個新功能，意思就係當你拍攝完照片之後，就可以即時在相機中自製 QR code，更能方便用家同朋友影完相之後，即時 share 俾朋友。在示範呢個「即時分享 One Time Share」新功能之前，你要準備幾樣野，首先你要在 Play Store 中下載「EXILIM Connect」以及 「Scene」的 Apps （值得注意的是，如果你就咁在 Play Store 搜尋 Scene 的話，可能會見到太多相關軟件，未必會咁容易搵到合適的軟件，所以建議用家在 「EXILIM Connect」 入面的連結下載「Scene」。
▲ 首先假設你影左張相，然後想將佢製成 QR Code 分享俾你身邊的朋友。
▲ 之後你就可以在相機上按 Wi-Fi 這個按鍵。
▲ 然後你就會見到呢個畫面，按「配對」。呢個時候，你就要在手機上打開「EXILIM Connect」呢個軟件，開啟藍牙以及 Wi-Fi，同部相機進行同步配對。配對完之後，你就可以選擇「傳送至手機」。
▲ 撳左入去之後，你可以見到有幾項選擇，包括「掃碼共享」、「自動傳送」（你可以選擇「全部」自動傳送，或者只傳送自拍 / 人像照)、「傳送選取的影像」（透過 Wi-Fi 傳送相片到手機) 以及「在手機上檢視」。咁因為而家係示範「即時分享 One Time Share」功能，所以我就選擇「掃碼共享」。
▲ 然後你會見到「正在處理...... 請稍後......」，其實係 Load 緊你相機入面的相片。
▲ Load 完之後，你就可以按「Set」選擇你要製作 QR Code 的相片。揀完之後按「Menu」，咁就搞掂!
▲ 按完「Menu」之後，你就會見到出左個 QR Code，你可以將 QR Code 製作成相片，亦可以就咁俾朋友用 QR Code Scanner 掃描。掃描完之後，就可以檢視或者下載這張照片。
小結
玩過 Casio TR-70，自己用緊 EX-10，上手呢部 EX-ZR3600，個操作介面讓我覺得好有親切感。雖然外型方面並不如 TR-70 般華麗，但上手的感覺是 TR-10、EX-10、EX-ZR3600 三部機當中最好的。顏色方面係就係女仔左啲，不過版主覺得男仔用白色的 EX-ZR3600，感覺應該都會相當不錯。唯一最令版主覺得不滿的是，唔知係因為樣品機，還是因為太多人連接的緣故，版主與一眾行家在配對手機和相機的過程，即使在工作人員的協助下，都依然花了不少時間去進行配對，因為試過好多次，都連接唔到。不過幾經辛苦，最後終於成功配對。在三個重點升級當中，版主比較欣賞是「即時分享 One Time Share」呢項功能，因為有時人多，而朋友仔又想即時攞到相的話，呢個功能就大派用場。至於其餘兩項升級，唔係話多餘，不過版主個人覺得無乜必要。唔知大家對於呢部 EX-ZR3600 有啲乜野睇法呢?
在文章刊登時，Casio EX-ZR3600 的建議零售價為 HK $3280，按這裡有詳細規格及最新賣價。