▲百老匯等電器舖循例在 G11 的價錢牌上貼上「照價再減」的標貼，但係減幅只有 $100。
扭芒重生的 Canon PowerShot G11，實物未到港，半專業拍友已經猛話正，到上星期正式賣街後，真係搶貨搶到七彩！
當然，首批貨數量有限，係 DC 舖唔夠貨賣的主因。出機當日，好多舖頭只獲派 3 至 5 部現貨，十居其九即日已經賣清，聽講最快要到今個星期尾先再有貨返。價錢方面，現時全旺角大電器舖的暗盤價，最多只比定價平 $100（$4,380），細 DC 舖亦唔例外，都只係平一、二百畀客。因為聽講一部 G11 的返貨價，大約要 $3,900 左右，所以呢一刻真係冇乜劈價空間，除非你同間舖熟到唔賺錢賣機畀你，否則現時極難用 $4,000 樓下買到。
其實目前最頭痕的，應該係那班 G10 用家。王大文可以話畀大家知，G10 的回收價只剩番 $2,500，現在就放 G10 換 G11，真係會蝕好多，除非你部 G10 係一出即買，已經用到夠皮。較為抵的方案，應該係等多一陣，等 G11 跌少少價，而 G10 回收價又未大跌時換機。另外，我唔建議大家貪平買番 G10 新機，因為佢仍然賣緊 $3,400，加幾百買 G11 好過啦！
▲同 G10 相比，G11 最吸引之處，當然係有得扭芒。