(以下人名純屬虛構，但事件經歷真實發生)
旋轉拍賣「退票黨」騙案分享
話說阿強就喺旋轉拍賣 App 入面，就放售一部手機，乜嘢手機就唔講啦，標價 $3000。咁產品上架之後，佢就好快收到唔少 PM，但用開旋轉拍賣嘅都知，好多買家都好鍾意講價，出價 $2800、出價 $2500，甚至出價 $2000 都夠膽死。而呢個時候，有一個買家，價都唔講，直接開價 $3000，咁就係因為呢個舉動，成功引到我呢位朋友踏入圈套。成個聊天過程，都係喺旋轉拍賣嘅 App 入面進行，咁一開始都係正正常常傾交收嘅程序，問佢幾時可以交收，咁佢就話即時可以，話有朋友喺佢住址附近，可以幫佢交收，話見到佢朋友之後，佢就會戶口轉帳畀阿強。阿強都有問過對方：「無現金 / Payme / 轉數快？」對方話無，仲話戶口保障大家，講到話朝早先畀人呃完話賣假貨，仲話「收唔錢你咪畀部機佢囉，收唔到就唔好畀」。咁阿強就出於同情，就信咗佢，心諗最終收到錢就得啦，無乜所謂，於是乎就落樓同嗰位所謂「朋友」交收。
佢就提供咗佢「朋友」個車牌，話係揸車嚟。咁最終阿強就去到交收地點，果然見到有架小型貨 Van，咁佢就行埋去同佢朋友打招呼，然後阿強就同「買家」講，見到佢朋友喇，過咗數話佢知。之後佢就 send 咗張相畀阿強，話過咗數，阿強就即時打開銀行 App 睇，見到顯示「+$3000」，咁就無特別留意，就以為收到錢，畀咗部機對方。
▲ 騙徒發給阿強的相片。
▲ 阿強當刻見到入帳 $3000，唯沒有注意到，上方「可用結餘」跟「戶口結餘」不相符，也不了解 CQM DEP 的意思，一不小心讓自己掉進了陷阱。
發現原來係支票
後來佢諗住去櫃員機撳返啲錢出嚟，先發覺 —— 咦？點解戶口結餘同可用結餘係兩個數字嚟嘅？於是乎佢再入去個銀行 App 度望清楚，見到寫住「CQM DEP」，佢又唔知係咩，上網查下 Google 大神，先知原來係支票入數嘅意思，之後再碌碌下，見到有啲文章講，覺得同自己經歷有少少似，嗰刻佢先心知不妙，出事了。不出所料，第二日阿強就收到 SMS，顯示「你所存入 (銀行戶口) 的 HK$3,000.00 支票已被退回」，咁佢先確定咗自己係遇上了「彈票黨 / 退票黨」，騙徒往往就係趁你當面交收緊嘅時候，無仔細留意，就成功呃到一條水魚。
最後阿強解決方法，就去咗報案，錄口供。而問到，如果佢有部手機嘅 IMEI 碼，有無可能查到部手機？警方就話，佢哋的確係有個系統可以追蹤到，佢仲話「同你講無追蹤，你都唔會信啦」，但要係大 case 先會動用呢個系統，好似阿強呢啲細 case，就算有 IMEI，都唔會申請到動用呢個系統，唔怪得上得新聞嗰啲，多數都係講警方點樣搗破乜乜犯罪集團，涉及價值唔知幾多百萬啦。
咁無辦法，阿強最終只好耐心等待，而家佢就希望，警方就算唔可以幫佢成功搵得返部機，都起碼可以成功將啲犯人捉拿歸案啦
。所以呢度都奉勸大家，如果你平時有用開旋轉拍賣呢類平台做買賣，都盡量用現金交易最穩陣。同埋記得將呢個 case，分享畀你身邊成日都會旋轉拍賣賣嘢嘅朋友知呀！