iPhone + Android 共用 WhatsApp 帳號教學
大家都知，版主我主機係用 iPhone，順理成章我主要 WhatsApp 都係安裝喺 iPhone 上。問題來了，大家都知我哋成日都要試 Android 手機，但會遇到一個麻煩，如果我好中意部 Android 手機，想將佢當主機咁用，咁至少我用呢部 Android 手機嗰陣，都可以應付到平時日常需要，例如用到 WhatsApp 同 PR 或者屋企人聯絡，但唔通每次我要用 Android 手機，都要將 WhatsApp 由 iPhone 轉去 Android 轉來轉去咁麻煩嗎？咁樣會令我好難全心全意去用一部 Android 手機，而呢樣相信係 iPhone 用家嘅心聲。不過，而家我會教大家，點樣可以 iOS 同 Android 手機共同一個 WhatsApp 帳號。
| 第一步：首先你主機係要 iPhone，WhatsApp 本身就裝咗喺 iPhone 上面。然後你用 Android 手機去 App Mirror 網站，下載 WhatsApp Messenger 2.22.25.8 beta 版 (呢個網站可信性好高，好少會有問題)，並完成安裝。 第二步：安裝完之後，直接開 WhatsApp？錯！因為如果你直接開 WhatsApp，揀完語言之後，佢照舊會要你輸入電話號碼，但呢樣唔係我想要嘅嘢。你要做嘅，係去 Android 手機的「設定」入面，選擇「系統」，選擇「關於手機」，進入「軟體資訊」，連按「版本號碼」，直至成功開啟「開發者選項」。 第三步：因為本來呢個版本係 for 同 Android 平板同步，所以我哋要用一啲小技巧，去將部手機變成「平板」。進入「開發者選項」，選取「最小寬度」，記下原本的 dp 值，然後調整至 600dp，咁樣你嘅 Android 手機就會變成咗平板 Mode。 第四步：開啟 WhatsApp，選擇語言，之後你會發現，不會再是輸入電話號碼頁面，而係顯示一個 QR Code。 第五步：返去你部 iPhone，打開 WhatsApp，「設定」，「已連結裝置」，再選擇「連結裝置」，掃一掃 Face ID 解鎖，就會開啟 QR Code Scanner 頁面，掃一掃 Android 手機上嘅 QR Code，咁樣就可以將 WhatsApp 同步去 Android 手機上。 第六步：最後，去返「開發者選項」，將最小寬度 dp 值回復返原本嘅，咁就搞掂。 |
| 手機 Mode | 平板 Mode |
 |
 |
 |
 |
Android + Android 共用 WhatsApp 教學
其實方法同上面 iPhone + Android 共用 WhatsApp 教學大同小異。簡單來說，主機和副機都要安裝 WhatsApp Messenger 2.22.25.8 beta 版，然後主機登入返你本來的 WhatsApp 帳號，副機就去「開發者選項」變更最小寬度 dp 值，將手機變成平板 Mode，之後都係一樣打開主機 WhatsApp 嘅設定，「已連結裝置」，「連結裝置」，掃返 QR Code 即可完成同步。同步後將最小寬度 dp 值回復即可。實際使用有無伏？
暫時版主初步使用，未覺有大伏，當有人 send WhatsApp 嚟，iPhone 有通知之餘，Android 手機亦都有收到通知，基本上無乜太大延遲。學到未？如果大家覺得實用嘅，記得將呢篇文章 Share 畀你身邊嘅朋友睇呀！