政府取消安心出行碼！三個方法教你免用 App 掃針卡
左定坤 (Cho Ting Kwan)
2022-12-13 16:50
|
手機綜合區
每次出入食肆場所，成日都要掃安心出行好麻煩，但掃咗又唔知有乜用。終於今日，行政長官李家超宣佈，明日起唔需要再掃安心出行！不過，係唔係代表，安心出行個 App 可以 del 得呢？政府就當然叫你唔好 del，就話個 App 功能唔淨止係掃描，仲包括咗「疫苗通行證」、電子針卡等等嘅功能。但，其實唔用安心出行 App，都無阻你出入食肆等場所。呢幾個方法，可以教你免用 App 掃針卡！
001: Screenshot 截圖
雖然「安心出行」掃描功能已經撤消咗，但你出入食肆等場所，其實依然係要嘟針卡，而呢個相信係大家用「安心出行」嘅主要最常用功能。不過，如果你想刪咗「安心出行」，其實唔係唔得，你只要打開「疫苗通行證」，將佢 Screen Cap 咗佢，出入去返相簿搵返張相，咁就 OK。
002: Wallpaper 大法
其實同 001 方法大同小異，不過有聰明嘅朋友仔諗到，不如索性直接將佢變埋 Wallpaper，咁以後出入食肆着個芒，嘟一嘟，咁就搞掂！咁樣確實係方便！尤其是 iPhone 用家，升咗 iOS 16.1 之後，啲通知變到去最底部，唔會阻住你令你睇唔到張 Wallpaper，用喺呢個 Moment 就至啱！
003: 紙本「疫苗通行證」
呢個應該比較少人會用，就係你打完針之後佢會畀返張紙本嘅「疫苗通行證」你，你直接拎出街入食肆，畀部機嘟一嘟紙上嘅 QR Code，咁就可以乜 App 都唔使，進入任何場所！
