大陸支付寶可以綁定香港 Visa / Mastercard！香港 AlipayHK 可以過錢去大陸支付寶？

左定坤 (Cho Ting Kwan) 2023-06-27 20:55 | 手機綜合區

我記得以前我成日都想返大陸去搞返個大陸銀行戶口，目的就係為咗想用大陸嘅支付寶，但我嗰陣時就唔係為咗成日返大陸消費，而係純粹為咗以前搞網店，方便上 1688 阿里巴巴批發入貨。當然，開通到大陸支付寶，好似以前咁多 trip 返大陸，其實有都方便，但以往要開通大陸支付寶，係需要大陸銀行卡，我搞咗好耐都懶得搞，最後就放棄。而家唔使煩喇，而家大陸支付寶終於支持香港 Visa、Mastercard，咁都方便咗唔少！想知詳情，睇下文啦！

如何將 Visa、Mastercard 加入至支付寶？

一知道大陸支付寶終於可以支持香港 Visa、Mastercard，一直用唔到大陸支付寶嘅我，都即刻下載返大陸支付寶落嚟，註冊返個帳號！註冊帳號其實就唔煩，用電話號碼收 sms 註冊已經得，加入信用卡嘅過程都唔複雜，只要去「我的」位置，選擇「銀行卡」，你會見㺫支持綁定乜嘢嘅銀行卡，當中加入咗 Visa 同埋 Mastercard，選擇「添加銀行卡」之後，入返信用卡嘅資料，就可以成功加入到大陸支付寶度了！

001：下載並註冊「支付寶」帳戶。

002：登入後按「我的」，選擇「銀行卡」。

003：選擇「添加銀行卡」。

004：入返 Visa、Mastercard 資料。

005：完成。
 

香港 AlipayHK 可以入錢去大陸支付寶嗎？

可以。正確嚟講，佢唔係叫轉賬，而係匯款，AlipayHK 首頁「應用中心」位置有個功能叫做「匯款」，可以畀你「匯款到內地」、「匯款到菲律賓」或者「匯款至印度尼西亞」，而選擇「匯款到內地」，就即係以內地支付寶收款，所以只要你係有內地支付寶，就可以自己匯款返畀自己，我有比較過 Google 匯率，Google 出來結果係 HK$1 = 0.92 人民幣，而 AlipayHK App 入面匯率係顯示 0.918，可見其實唔係差好遠，不過匯款就需要手續費，但如果你匯款超過 $3500，就可以慳返手續費。而成個匯款過程，最快 1 分鐘就搞掂。

另外，根據 App 顯示，就以我「中級會員」為例，現時單筆可匯款限額為 HK$7999，即約為 7340 人民幣，如果你要提升限額，就要透過自拍去升級認證。