想玩 LEICA 1 吋 CMOS，唔一定小米！Leica 「親生仔」Leitz Phone 3 水貨到港 賣呢個價

左定坤 (Cho Ting Kwan) 2024-04-23 14:10 | 手機綜合區

好多人買手機，都好 care 相機鏡頭掂唔掂，影出嚟嘅相有無味道，而講到有無味道，其實某程度上都好睇個 brand 點樣去 tune，所以而家好多時啲手機都同相機品牌合作，而呢啲相機品牌會協助手機廠，將相機調校到有佢哋風格嘅味道，然後做個「認證」，好似想要奶味，就會搵有 Leica 認證鏡頭嘅小米旗艦機；想要哈蘇風格，就搵 OnePlus；想要蔡司風格，就搵 vivo。想點 tune，就點 tune。不過，如果想玩 Leica 鏡，其實唔一定小米，Leica 自己都有出手機，早前發表咗 Leitz Phone 3，而水貨亦已到港，呢個價又能唔能夠挑機小米呢？睇下文啦！

Leica Leitz Phone 3 水貨抵港 賣呢個價

Leica 日前正式發表了新一代旗艦手機 Leitz Phone 3，與 Sharp Corporation 合作專面面向日本市場生產，並透過 Softbank 網絡商銷售。但香港人想買到，其實唔難，因為你估水貨唔會入？淨係 Leica 呢個名頭，已經值得水貨舖入貨啦！Leitz Phone 3 水貨最近就正式抵達旺角先達，第一水賣價為 $12200，呢個價錢入手到 Leica「親生仔」手機，而且只係第一水賣價，後續會有更多下調空間，價錢嚟講並不過份，如果畀網友揀，你會揀 Leica 定小米？相信大家心中已有答案。

Leica Leitz Phone 3 硬件規格

不過規格上，Leica Leitz Phone 3 雖然定位都係旗艦手機，但性能上只維持上年嘅水平，配備 Qualcomm Snapdragon 8 Gen 2 處理器，而非小米 14 Ultra 所用嘅 Snapdragon 8 Gen 3，如果沒有太看重是否最新旗艦 U，Gen 2 同 Gen 3 用落喺性能上又唔會有太大分別，我就覺得可以接受。Leitz Phone 3 用上 6.6 吋 OLED 屏幕，解像度為 2730 x 1260，機背有標誌性嘅 Leica 紅標，淨係呢個 logo 都非同凡響。

另外，Leitz Phone 3 內置 12GB RAM 以及 512GB ROM，電池容量為 5000mAh，具有 3.5mm 耳機孔，相機配備一個 4720 萬像素的 1 吋 CMOS 後置鏡頭，支持 6 倍數碼變焦，配合優化過的 Leitz 濾鏡，輕鬆拍攝「奶味」作品；而前置鏡頭則有 1260 萬像素，支持 8 倍連續可調數位變焦。

水貨查詢：三禾電氣