PayMe by HSBC 推出全新銀聯虛擬卡！全球消費都可以用佢，中港澳免手續費

左定坤 (Cho Ting Kwan) 2024-08-07 18:12 | 手機綜合區

今時今日就算去旅行，都好少會兌好多現金，好多時候都會索性用 Visa Mastercard 銀聯卡就算，基本上大部分地方都收，相當方便。而香港人最常用嘅電子支付平台 PayMe，今日就宣佈推出首張銀聯虛擬卡！變相你去全球任何地方消費，有 PayMe 就得！

HSBC 推出全新銀聯虛擬卡

由 8 月 8 日起，用戶更新 PayMe 應用程式後，就可以透過掃描商戶展示嘅銀聯二維碼，或向商戶出示 PayMe 應用程式內嘅銀聯二維碼在全球付款。當用戶喺外地以外幣付款時，款項會按銀聯嘅匯率計算，並直接喺 PayMe 錢包餘額扣除。而呢張虛擬卡亦可以喺接受銀聯嘅商戶進行網上購物。

PayMe 用戶喺完成身份證或增值方式認證後，即可啟用虛擬卡。用戶喺中國內地、香港及澳門消費均可享免手續費優惠。佢哋亦可以透過 PayMe 應用程式輕鬆管理佢哋嘅虛擬卡，包括鎖卡、解鎖及查看其虛擬卡嘅資料。