(有片!) 可以打電話嘅 E-Ink 電子書！唔跑分，純講感受，簡單開箱評測：外觀 + 用後感

左定坤 (Cho Ting Kwan) 2024-09-30 14:19 | 手機綜合區

E-Ink 電子書以前用得多，真 E-Ink 手機，除咗玩過 YotaPhone，我真係無乜玩過其他品牌，有呢類型嘅手機，可以打出打入仲用 E-Ink 屏幕。YotaPhone 都尚叫有兩個芒，一個用正常芒，for 正常操作，一個用 E-Ink，for 電子書，但今次我試呢部手機，只有一個芒，即係無論你正常上網、睇 Facebook，或者睇電子書，都係一個芒做哂，到底咁樣係一個特色，定係一個缺點。睇下文啦！

內文.jpg

Bigme Hibreak 智能手機用後感

說的是來自 Bigme 嘅 Hibreak 智能手機，講到 Bigme 呢間公司，你可能會覺得陌生，其實簡單嚟講，佢都係一間大陸公司，大陸品牌，大陸製造，但無可否認大陸廠先會成日諗到好多特別嘅手機賣點，先唔講係唔係實用，但有 Gimmick 都唔係一件壞事。而今次呢部手機，賣點就係用上 E-Ink 屏幕，唔係黑白嗰種，而係彩屏嗰種。而我對佢嘅評價，係持着欣賞嘅態度。大概可以從以下幾方面去做一個簡單評價：

設計：邊框粗，設計比較過時，但機背用像牛皮般的材質，呢點我又幾 Buy，後面有單鏡頭，但我基本會直接無視，買部咁嘅手機，絕對唔會攞嚟影相，係絕對！

屏幕：用 E-Ink 有特色，不過有一定缺點，最基本係 E-Ink 嘅通病，更新率低。睇小說可以，其他使用上你會好唔適應，倒不如買部 TCL 50 Pro NXTPAPER 5G。其次係雖然用彩屏，但都係因為 E-Ink 材質關係，彩色得嚟並唔會好 Sharp，同埋解像度偏低，呢個都係一個缺點。

性能：其實性能並唔會有得好講，畢竟呢部手機極其量賣點係可以打出打入嘅電子書，唔會用好好勁嘅 CPU，一般使用上除咗更新率慢略嫌不習慣之外，都好少會有 hang 機情況。

價錢：彩色版本早鳥優惠 $2299，TCL 50 Pro NXTPAPER 5G 賣 $2699，你會點揀？

其他特色：計我話，呢部手機最大特色，除咗用 E-Ink 屏幕，其次應該係支持 ChatGPT 4.0，內裡有個專用 App，可以喺入面問佢一啲問題，或者叫佢寫文章，不過就首先要開咗個 Bigme 帳號先。