Happy SIM 「星馬泰印 5G 10 日無限上網 (不限速)」試用
我哋一團人去咗馬來西亞 4 日 3 夜，出發之前就問 Happy SIM 拎咗張「星馬泰印 5G 10 日無限上網 (不限速)」去用，試下呢張 SIM 嘅速度如何之餘，順便睇下係唔係真無限上網。而因為都唔係乜廣告，我就唔會就住就住，又景點 A 跑一次 Speedtest，景點 B 跑一次 Speedtest，當然我都一樣有跑，但我唔會將 Speedtest 嘅優先次序放喺首要，而係以真實用家角度為主。當日朝早 8 點幾正式香港出發，去到馬來西亞大約 12 點左右，而當飛機未停定，仲喺馬來西亞機場入面慢行時，其實我放喺 iPhone 15 Plus 上用嘅 Happy SIM，已經開始收到當地網絡。趁住飛機未停定，我已經第一時間試下跑個 Speedtest 睇下張 SIM 咩速度。下載速度有 51.2Mbps、上載速度 20Mbps。
真實用家 4 日 3 夜狂 Chur 評價：係咪不限速？
咁其實成個旅程入面，我都不時間唔中跑下 Speedtest，有時搭緊車無聊無嘢做又跑下，去到某個地方坐低無嘢做又跑下，因為我係真實用家，我就分享一下我呢個真實用家嘅評價：001：去到馬來西亞，唔係個個地方都收到 5G 訊號，其實好多時候都會跌返落 4G。
002：絕大部分時間下，下載速度都圍繞住 50Mbps 左右，但就好難再有更快嘅突破，而有小部分情況下，速度會跌到 10Mbps 或以下，但呢種情況唔算十分頻繁，純粹睇咁啱嗰個位置收到嘅訊號強唔強。
003：係唔係真無限？用咗 4 日 3 夜，我可以有責任咁同大家講，絕對係。我完全係無慳住慳住用，有跑過 Speedtest 嘅都知道，其實跑一次 Speedtest 用你 1-2GB 數據，真係唔過份，而我跑咗咁多次 Speedtest，都依然保持水準，算係唔話得。
004：Speedtest 未為準？真實使用場景如何？多得有 Happy SIM 真無限數據 SIM，嗰幾日我簡直就變咗係流動 WiFi 蛋，放 WiFi 畀其他唔夠 Data 嘅團友使用網絡，除咗受限於 iPhone 放 WiFi 連接上限為 5 個裝置，其他基本完全無問題。而平時普通 WhatsApp、Facebook 都零障礙，自己喺房雖然酒店房入面收訊一般，但無無聊聊睇下 AV，都一樣順暢。Speedtest 未必有用，但真實體驗最實際。