P.S. 頭盔 Mode：版主並無教唆北上用 VPN 之意，純粹分享給或許有需要用到的人使用，一切風險閣下自理。
iOS VPN App 版主實測，完全免費
今次試用嘅 VPN App，叫做快喵 VPN，本來諗住碰碰運氣，用 iPhone 喺 App Store 度下載嚟試下，估唔到又好似真係完全免費！使用方法好簡單，只要安裝完成後，打開個 App，你就會見到有個畫面，中間有隻貓，頂部有國家、地區可以選擇，其中包括有美國、日本、英國、德國等等，而下方會見到有兩個選項，一個就係「連接免費 VPN 伺服器」，而另一個則係連接「專屬高速伺服器」，簡單嚟講，唔使錢可以用，想快啲就課金啦，月卡會員 $38 一個月，而年卡會員則為 $228 / 年，並可享首 7 日免費。而免費版整個過程，係完全唔使註冊。根據快喵 App 入面訂閱服務的描述，升級到高級會員方案可享專屬高速 VPN 伺服器，號稱比免費服務快 10 倍，並且擁有穩定連接，就算鎖屏後都仍然能夠保持連線 (免費版鎖屏後一段時間就會斷開網絡)，更可享無廣告、無用戶活動日誌等服務。
然而，版主呢啲 Cheap 友，又無諗住要課金嘅，今次我就先試下，到底免費版夠唔夠用，畢竟佢都可以完全免費試用。地點位於華強北附近嘅八號季酒店公寓，連接咗酒店 WiFi，本身就用唔到 WhatsApp Facebook，但使用咗呢個快喵 VPN，就可以成功用到，亦可以 YouTube 上睇片，經過 Speedtest 應用程式測試，下載速度為 3.72Mbps，而上載速度則為 3.22Mbps，個人覺得喺手機上基本使用，都算係夠用，免費喎，仲想點？
Android 版、電腦版需註冊，沒有無限免費使用
順帶一提，呢個快喵 VPN 都有 Android 版同埋 Windows / Mac 電腦版，但兩個都要上佢哋官方網站去下載 apk 或者 exe 檔，但有趣嘅係，版主就試過下載 Android 版同 Windows 版，同 iOS 版唔同嘅係，佢係要註冊會員先用得，而且註冊完淨係得 15 分鐘可以免費試用，試用完就要課金先可以繼續用，手機、電腦端互通，似乎免費任用目前嚟講，只係 iOS 獨有嘅「福利」。不過版主都用 Windows 版註冊咗個會員試試，同一個位置跑個 speedtest，下載速度有 76.12Mbps，而上載速度則有 20.76Mbps，明顯比我 iPhone 上嘅免費版快得多。咁就睇下你多唔多返大陸，同埋有無高速上網嘅需要了。
P.S. 頭盔 Mode：版主並無教唆北上用 VPN 之意，純粹分享給或許有需要用到的人使用，一切風險閣下自理。