勁過小米尿袋？支持雙 140W 輸出 + 40000mAh 核電
版主鍾意玩尿袋，電愈大，我就愈中意，最好有埋快充，叉到電腦，就更爽。之前小米送咗隻 10000mAh 快充尿袋畀我，雖然容量唔大，但佢支持 90W 輸入速度以及最高 120W 輸出，叉其他裝置快，叉自己亦都好快，飲杯咖啡坐一陣，又差不多可以將佢叉滿，相當方便。不過，我始終覺得佢舊電唔夠大舊，忍唔住走去自己買咗隻新出嘅 25000mAh 尿袋，賣點係支持 140W 輸出，而且有 25000mAh 大電，上飛機都無問題，而呢隻尿袋賣價為 $599，貴定唔貴就見仁見智。然而，最近又留意到有款來自 AOHi 的中國品牌，就推出咗一款尿袋，其實早喺 2 年前已經喺 Kickstarter 做過眾籌，但最近就有公司 Searching C 就引入呢款尿袋，官方賣價大約 $1500 港紙左右，但佢哋預計早鳥優惠價會係 $998，唔單止擁有 40000mAh 超大容量，而且支持 PD3.1 140W 雙快充，無論插邊個窿都可以叉到電，而輸入速度同樣有 140W，仲快過隻小米，仲可以同時為三部裝置充電，個樣又靚靚仔仔，確實係幾吸引到我！
不過，你可能會問，40000mAh 咁大舊電池，到底可唔可以拎上機呢？喺我哋平時嘅認知，似乎只有 100Wh 的尿袋，先可以帶上機，但事實上其實高於 100Wh、低於 160Wh 的尿袋，都一樣可以帶上機，不過就要出發前先向航空公司聯絡，取得批準，先可以上機。至於高過 160Wh 的尿袋，則全部航空公司都唔可以上機。所以如果你想帶佢去外地，就要注意呢個限制了。
報價查詢：Searching C