接近 LG G4 的規格， Nexbit Robin 香港開賣消息你要知！
能夠在 Kickstarter 集資成功的例子其實唔少，但係大家有機會係香港買到的手機就好少。呢部 Nextbit 第一件作品，目標係做出「與眾不同的產品」，主打「與眾不同的雲端體驗」的 Robin 最終能夠同大家見面，實在係幾難得嘅一件事。係分享開箱體驗之前，先再講一下呢部機規格等資料先。雖然 Nextbit 強調，硬件唔係呢部機最著重的部份，做到恰到好處就足夠。事實上 Robin 規格都唔太差，有 5.2 吋 FHD 屏幕， Qualcomm S808 處理器配 3GB RAM 以及 32GB 內置容量，而相機都有 1300 萬像素主鏡頭配 500 萬像素前鏡，電池為 2680mAh 。而 NFC 、指紋辨識以及 Qaulcomm QC 2.0 快充等功能都一應俱全。再加上手機已經用上 Android 6.0 ，整體來講 Robin 未到旗艦級數，但同大廠中階機相比卻有一定優勢的。
初步介紹完之後，再講下大家都會關心的開賣資料。 Nextbit Robin 銷售方式同 OnePlus 好相似，都係網上買機而且會有一年保養。不過，呢個保養有點特別，一般大廠手機保養係用家 Root 機、更換 Bootloader 後就會失效。但係 Robin 係開放比用家自行解鎖、解換 Bootloader 都不會影響到一年保養，而且手機都會維持 18 個月內有 Android 版本升級。 Robin 係 2 月 18 號就會正式開賣，香港都可以買到，而價錢暫定係 399 美金，大約係 $3110 港幣左右。
▲ 一年保養連 Root 左機都會照補，吸引吧？
Nexbit Robin 開箱！外型搶鏡，手感又得唔得？
雖然 Robin 主要賣點係 100GB 雲端儲存容量以及其「雲端接續服務」。 Robin 的系統係可以分析用家使用習慣，將一些較少用的 App 、文件、相片上傳至加密的雲端空間。簡單來講即係一種近乎無縫的雲端＋實體容量結合，同一般雲端服務好似 Dropbox 、 Google Drive 要用家手動上載東西完全不同。不過，呢啲咁「離地」的賣點唔好話係一般消費者，連版主個人都唔會有好大興趣。所以 Nextbit 好聰明地在 Robin 的外型上，投入左唔少心機。為左貫徹「與眾不同的產品」呢個概念， Robin 係用色上唔單止有一般手機常用的黑／白色設計，版主手上的 Robin 就係薄荷綠色。機身設計都唔同 iPhone 6s 、 S6 edge 、 One M9 等偏圓的外表，而係比起 Sony Xperia Z 系列更加方正。兩個特色加起上來，客觀效果就係令 Robin 外型相當搶眼，能夠帶來新鮮感之餘，也叫人一見難忘。不過，手感上版主就覺得 Robin 有好亦有唔好，而家就詳細講講。
雖然 Robin 只係用左塑膠機身，相對於今時今日大廠已經在旗艦上全面改用的「全金屬機身」、「前後 2.5D 玻璃」設計，看起來有點輸蝕。但其實 Robin 用上的霧面碳酸聚酯材質（感覺就係霧面硬膠）感覺都幾扎實，拎上手都幾舒服。而且 Robin 厚度只有 7mm ，算係輕薄而且輕身唔墜手。
不過 Robin 外型係缺點方面都有唔少。首先係方正機身帶來的問題， Sony Xperia Z 系列的用家都知道，雖然手機外型四四方方，但因為四角頗為圓滑，所以手機握在手上感覺都不錯。但係 Robin 外型四四方方卻沒有做到「圓角」設計，手機拎上手時，手掌心就會被 Robin 的角位「吉到」，對手感影響係幾大的。另外， Robin 只有 5.2 吋芒，但機身大少卻同 5.5 吋的手機差不多，再加上沒有採用窄邊框設計，即使係「大手之人」亦難以單手操作。最後就係電源鍵的處理， Robin 同 Sony Xperia Z5 一樣將指紋掃描放入電源鍵，不過 Robin 處理得不如後者般好。無論按鍵的觸感還是開鎖的方便程度， Xperia Z5 都更勝一籌。 Nextbit 係設計同造工上，都有改進的空間呢！
▲ Robin 的包裝盒相當簡潔，外型都幾特別。
▲ 盒內只有一條 USB Type C 線以及一支 SIM 卡針，一樣好簡潔⋯⋯
▲ 版主同時收到一個快充插頭，有 5V/2A 、9V/2A 、12V/1.5A 。
▲ 先來個正面照。
▲ 再來個背面～
▲係外型上，雖然用左膠機身，但 Robin 都仲見到一點 HTC 影子的，講緊嘅就係機面雙喇叭。
▲ 機底部份都有一個喇叭，版主試過都算幾好聲。
▲ 其實個人並不太追求窄邊框，但 Robin 的邊框實在粗左啲。
▲ 另一個外型上的缺點就係沒有用上圓角設計，會「吉」到手掌心⋯⋯
▲ 機身左邊就係音量鍵，外觀「靚仔」，但唔算好按。
▲ Robin 一樣有指紋辨識，但係對比同樣設計的 Xperia Z5 ，不論係按鍵舒適度還是解鎖成功率， Robin 都差一點。
▲ 主鏡頭旁邊有一個雙色 LED 燈。
▲ 鏡頭下方的雲 LOGO 係 Nextbit 的標誌，下方有四顆 LED 燈，係資料上傳至雲端時就會亮起。
▲ 機底有一個 USB Type C 插口， 3.5mm 耳機插孔係機頂。
▲ 整體來講，版主會話 Robin 外型會係一部幾討好的手機，但係細節上可以做得更好。
總結：詳細試用體驗？好快會有！
以上就係今次的 Nextbit Robin 初步開箱試玩體驗。可惜因為保密協議的關係，進一步的測試而家暫時未能同大家分享，係稍後時間會補上。另外， Robin 的重點功能「雲端接續服務」都需要一點時間去詳試，不過而家可以同大家率先講多少少心得。首先 Robin 係有中文介面的，但係介面就唔係純 Android 原生介面，既無 App Drawer 而且加入 Widget 的方式跟主流亦不相同， Android 用家初上手應該會有點唔慣呢！在文章發佈時， Next Robin 將於 2 月 18 日開賣，按此看手機詳細規格及最新賣價。
