001 : 高用量用家有難! 20GB 用量網友加最多！
正如版主 Keith 所講， PCCW-HKT 同埋 One2Free 今次合併就有加價，而加幅比較大既就係 10GB 月費，由 $298 加到 $388 ，足足有成 30% ！細心既網友可以留意到今次 csl. 係冇推出 20GB 月費，額外數據收費亦統一為 $99/1GB 。唔講大家唔知，以前 PCCW-HKT 是有 $190 topup 10GB 數據超平收費，但在新 csl. 月費裡面就無左啦。對於 20GB 數據用量或以上既用戶黎講貴幾多？分分鐘每個月要比成千蚊月費！簡單同你計一計，以前 PCCW-HKT 月費，SIM ONLY 帶機上台 20GB 用量係 $398，現在 csl. 新計劃，你要付 HK$1378，若果你用到 30GB，舊 PCCW-HKT 會係 $588，新 csl. 計劃...唔計了，反正 20GB 都過千，再加上去，二千蚊都實無走雞。
大家可以參考一下下面既表格，如果想要用到 20GB 用量既話，唔限速最低收費係 CMHK 既 10GB 月費比多 $300 買 10GB ，埋單 $610 一個月；如果唔介意有機會被限速既話就係 SmarTone 既 $434 收費最低 (不過，其實數碼通的無限上網計劃的限制，都只係紙上談兵，無網友反應埶行過)，不過對比起之前 $410 就有 20GB 月費就貴得多啦，高用量既網友係時侯諗下係咪需要改變一下使用習慣，畢竟每個月比幾百蚊都幾「甘」架！
| 電訊商 | 數據用量 | 月費 | 額外收費 | 20GB 收費 |
| CMHK | 10GB | $310 | $30/1GB | $610 |
| csl. | 10GB | $400 | $99/1GB | $1,390 |
| csl. (多人共享) | 20GB | $770 | $99/1GB | $770 |
| csl. (多機共享） | 20GB | $710 | $99/1GB | $710 |
| SmarTone＃ | 5GB | $306 | + $128 無限 | $434 |
| SmarTone＃ | 10GB | $436 | + $128 無限 | $564 |
| 3HK | 10GB | $360 | $90/1GB | $1,260 |
月費已計算行政費及必需要加的增值服務費用。
＃有公平使用原則。
＃有公平使用原則。
002. PCCW-HKT 同埋 csl 網絡合併！接收方面有什麼影響？
PCCW-HKT 同埋 One2free 合併，現有客戶應該比較關心網絡既問題啦。根據今日發佈會所講，佢地已經將兩邊既網絡逐漸合併，有些覆蓋重疊既地方會慢慢調整至最好狀態，而兩邊既網絡亦會互補舊有網絡既不足。係發佈會上面有講到以往 PCCW-HKT 係港鐵站既網絡 One2free 用戶都可以用到，達到更好的接收；而 PCCW-HKT 用戶亦開始用到 csl 既 900MHz 既 3G 頻譜，室內通話水準會更好。需唔需要換張新 SIM 卡先用到？其實兩個網絡已經合併左，用現有既 SIM 卡得架啦，當然有冇進步係以用家真實反應為準，用緊 PCCW/ csl 既網友都可以留言分享一下近排對網絡既感受
。
▲ 一眼睇晒兩邊既網絡點樣合併，除左有中間綠色的共通覆蓋之外，以往 PCCW 同埋 csl 既網絡亦會互補不足，以往收得差既地方會唔會有進步？都係網友講自己感覺最準！
003. PCCW-HKT 舊用家用到 iPhone 的 4G LTE 嗎？
正如上文所講，兩間個品牌已經合併成為一個網絡，所以 PCCW-HKT 既舊有客戶當然用到 iPhone 5/5s 既 4G LTE ，不過就版主就知道就要去門市換一張新既 csl. SIM 卡先。比個提示大家，版主求先去左換 SIM ，PCCW 分店既店員話暫時舊客都只可以換 PCCW-HK SIM ，不過如果去 csl. 門市換 SIM 就一定換到 csl 新 SIM 卡，即刻可以用到 iPhone 既 4G LTE ，記得去 csl. 門市大家唔好去錯地方呀！順帶一提， 舊 csl One2Free 門市亦以後亦有機會賣寬頻、 Now TV 等服務，大家查詢資料會變得更方便。（版主屋企附近冇 PCCW-HKT ，以後有咩都可以去 csl. 門市問了
）
▲ 版主堅持想要 csl. 既 SIM 卡，不過 PCCW-HKT 門市職員話舊客只可以換 PCCW SIM 卡，可能第一日合併程序有點混亂吧。不過以後 PCCW 同埋 csl 既門市都可以做到兩邊既服務，例如交月費、換卡、上台等等，真係辛苦晒前線員工
004. 今次合併會影響到 1010 嗎？
今次合併的是 One2free 和 PCCW 品牌，會唔會影響到 1010 呢？雖然話新 csl. 同埋 1010 係專攻唔同市場，不過網絡合併其實就同步影響埋 1010 既網絡，另一方面大家睇睇 1010 既月費就已經無晒 $200 以下既選擇啦，就算 1GB 月費都要 $219 ，如果買機上台 1GB 要 $339 月費（其實並唔係貴新 csl 好多
）不過 1010 既一個賣點月費儲「亞洲萬里通」仍然存在。
▲1010 、 csl. 同埋新世界全動網的全新定位。
005. 以往 PCCW 既 VAS 好似 「King傾」、「 Now TV 」， 新 csl. 用家係咪即刻用到？
兩間公司合併既其中一個重點就係服務方面有所改變啦！以往 PCCW-HKT 用到既 「King 傾」服務今日開始 One2Free/ 1010 既舊有用家就已經可以用到啦！而八達通 SIM 、「天機」轉移資料、10GB uHub 雲端空間亦都已經開通比舊 csl 用家，不過 NOW TV 就要等到 11 月 1 日先有得睇，Now 621 英超頻道亦都要等到 8 月新一季英超開始先生效。提提網友，呢類 VAS 係會扣除手機數據用量，唔留意既話會好易「爆 Data 」架！
▲八達通、 King 傾同埋天機服務， csl 用家都可以用到了，不過果然係要換過張八達通 SIM 先啦！
006. 我見到 csl 話有 13,000 個 Wi-Fi 熱點！究竟係轉用 PCCW 定係沿用 Y5Zone 呢？
版主都有留意到呢個問題，根據資料新既 csl. Wi-Fi 熱點係以 PCCW 既 Wi-Fi 熱點作主打，而現有既 Y5Zone 都可以用到一段時間，不過往後都會以 PCCW 熱點為主。
▲全新既 csl Wi-Fi ，主要是用舊有 PCCW 的 Wi-Fi 熱點
007. PCCW 同埋 One2Free 合併之後 漫遊數據又點計呢？
網友可能記得，以往 PCCW-HKT 係無漫遊日費通行證既，而合併左之後終於有啦！現時 PCCW-HKT、 One2Free 舊用戶、新 csl 用家，都可以用到漫遊日費通行證，每日每個地區無限任用收費 $198/日，同以往 One2Free/ 1010 同價，PCCW-HKT 既網友會唔會覺得方便左呢？
▲漫遊日費既地區可以係 csl 網頁搵到
008. 以往 One2Free 講過會推 LTE-A ，而 PCCW 會有 Vo-LTE ，合併之後會用到嗎？
官方指出兩邊網絡合併了之後，將會陸續宣佈推出全面的 LTE-A 服務，不過暫時還需要調整，不過問到門市 One2Free 用家已經可以用到 Vo-LTE 服務了，不過就要指定的手機，例如 Samsung Galaxy Note 3 。話說兩邊合併之後佔有很大量的 2600MHz / 1800MHz 頻段，透過 Carrier Aggregation 技術，是少數香港網絡商，支援升級 LTE-A 300Mbps。
▲ 新 csl. 的網頁入面都有提到加入 Vo-LTE 的支援服務了！
新 csl. = PCCW x One2Free 合併好定壞？網友留言齊齊講！
版主都知道大家對於兩間公司合併會有無限咁多個問題，唔知上面八樣重點解答晒大家既疑問未呢？網友們覺得兩間公司合併係好左定壞左？無疑月費價錢係加左，不過兩邊既服務亦都同時合併，也是一件好事吧！至於網絡合併方面，大家感覺是速度快了，還是在這段合併期變得不太穩定？對於 PCCW x One2Free 合併既問題、意見都可以係 Facebook 留言講下，版主們都會加入討論架！除左 csl. 合併加價之外， 3香港早前都改變左月費計劃，對於大用量網友黎講係加左價，想睇詳情就 Click 入：
取消數據封頂＝ 變相加價？3香港月費變動版主同你計 ！
