csl 重推「無限上網 Plan」，價錢相若細節要留意！
剛剛 csl 就公佈左「數據增值 兩極皇者」呢個新的「增值本地流動數據用量計劃」，包括有「競速皇」以及「用量皇」兩個組合，同樣係需要使用 4G 數據 Plan 的情況下加購的服務。當中前者就可以每月另加 $150 享有 10GB 數據，呢個對大家而言當然吸引力唔大。但「用量皇」其實就係「另類無限 Plan」，用戶只需要用 6GB 或以上的 4G 數據 Plan 就可以加 $150 購買，其實同 Smartone 以 $148 「升級至 FUP 無限數據」玩法相似，可以話係直接競爭，但會唔會更抵玩？不妨睇下以下 6 個要點。
▲ csl 新增的兩個服務，相信會以「用量皇」較受歡迎吧。
001 帶機上台一樣可以用，「用量皇」最平每月 $466
從 csl 的宣傳圖片中，大家可能以為「用量皇」只係買機上台以及選用月費 $498 的 6GB 數據用量用家先可用。但係版主問過，帶機上台月費計劃一樣可以用到「用量皇」，按 csl 最低要求，用戶要選用月費 $298（再加 $18 行政費）的 6GB 4G 數據用量上網 Plan ，再加 $150 「用量皇」就可變成無限上網，月費包行埋行政費是 $466。
▲ 版主問過，其實不論係買機上台還是攜機上台，只要滿 6GB 一樣可以用到「用量皇」。
002 ViuTV 限時優惠，用量皇一個月免費用
如果想不費一分一毫用到「用量皇」， csl 就有個限時優惠，係 4 月 30 號之前，按佢哋要求到 csl 專門店登記，都會有一個月免費試用。
▲ 3HK 有 MyTv Super 撐腰， csl 都有個 ViuTV。
003 現有客戶無份！（除非續約）
如果你係 csl 用戶，見到 csl 以下呢句「現時使用我們的6GB 數據或以上流動通訊月費服務計劃，或選用指定6GB 數據或以上買機上台或攜機上台服務計劃，並須簽訂24個月用量組合之承諾期」，可能會以為加 $150 就可以升級，但版主到門市問過，「用量皇」係針對新客戶的，現有客戶除非續約 24 個月，否則都用唔到。
004 對比 Smartone ，價錢其實差不多
上面提過， csl 今次呢個「用量皇」即係用家在用盡 6GB／10GB 4G 數據後，可以繼續享有 4G 上網，變相成為了無限數據 Plan。但其實 Smartone 一早有同樣安排，價錢方面兩者相比其實都差不多。 Smartone 方面，要求客戶最少要用月費 $298 （再加 $18 行政費）的 6GB 4G 數據 Plan ，而升級至 FUP 無限數據價錢就係 $148 ，即係每月 $464 ，首比 csl 其實平兩蚊雞，總體而言分別不大。
▲ Smartone 一樣可以在帶機上台 Plan 之中升級至無限數據，價錢同 csl 差不多。
005 csl 條款欠清晰，有機會中伏？
以下呢點相當重要，有興趣的朋友要多加留意。雖然 csl 的「用量皇」同 Smartone 的 FUP 無限數據相似，但係兩者在提供 4G 數據的條款細則上卻有不同，版主會將兩間網絡商的細則列出來同大家比較一下。首先係 csl 的用量皇，再來 Smartone 的。csl「用量皇」：「當你每月使用的流動數據用量超過該月服務計劃包含的數據用量，你可繼續使用流動數據服務，而你所享用的網絡資源將取決於當時的網絡狀況而有所調節。」
Smartone FUP 無限數據：「當每月數據用量達到選用服務計劃之上限，根據 FUP (公平使用政策) ，數據服務仍可繼續，而沒有速度限制或數據用量上限，但使用網絡之優先次序將相對較低，數據服務體驗或會受影響。」
可以見到 Smartone 明確列明 FUP 無限數據「沒有速度限制」，但係 csl 卻未有清楚提及，再加上 Smartone 的 FUP 無限數據增值服務推出已久，也未見有投訴呢。
006 csl 推出「用量皇」，或會影響 Smartone 決定？
其實今次 csl 推出「用量皇」，吸唔吸引抵唔抵玩可能係其次，對 Smartone 的影響可能更加重要。大家都知，FUP 無限數據升級在 Smartone 方面，已經不能在「流動裝置」以及平板上使用，只得手機仍然保留。 csl 加推「無限 Plan」，看來 Smartone 短時間內也不敢全面取消無限數據服務吧？參考：csl
無限上網相關資料
無限上網，變面回歸! 3 香港 推 4G 1Mbps 全月任用
4G 無限上網免費升級！電訊商推上台 Plan 新優惠，抵玩嗎？
神卡出場：Lycamobile $68 / 10GB 上網