根據 7-11 便利店的海報，呢張全新 csl. 旅遊 Club SIM，係在 2/5 起至 15/5 期間有售，不過版主昨日去過旺角 6 間 + 大埔 2 間 7-11 分店問過，全部都未有返貨，可能要今日，或者再過多幾日，才會有得買。不過都唔緊要，先了解一下呢張新 SIM 詳情，亦無妨。
以為淨係 7-11 先至有，誰料剛剛從官網上發現，原來 OK、VinGO、csl.、1010 等都會有得賣，但有無貨，就要四處問下先知。
卡價 $88，你可以見到張 SIM 係採用了天藍色的包裝，上面寫着「#旅遊Club你開SIM」，只要購買呢張 SIM，就可以享有 4 日亞太區 4G 漫遊數據，當中包括有中國、日本、韓國、台灣、泰國等地區，以落地起計算 24 小時任用，而唔係好似某些儲值卡咁，過咗 23:59 就當一日，每日旅遊數據用量為 500MB，500MB 之後就會限速至不高於 256kbps，對比起 128kbps 速度來說，256kbps 會相對勉強仲用得到。
咁都係 4 日咋喎，版主你又話有 $88 有 6 日嘅？果兩日其實係 for 新客戶的 Bonus 來，只要申請 Club SIM 會員，就可以額外獲得 2 日漫遊數據，加埋就有 6 日任用囉！當你本身已經係舊客戶，$88 4 日亞太區數據，平均計返都係 $22 一日，平過你普通 Club SIM 買 Daypass (正價 $28 / 日)。呢張 SIM，又係唔係短途旅行人士的福音呢？你又覺得抵唔抵呢？
賣價：$88
數據用量：4 日亞太區漫遊數據 包中國，每日 500MB，500MB 後限速至不高於 256kbps
額外獎賞：新登記 Club SIM 會員多送 2 日漫遊數據
購買地點：7-11、OK、VinGo、The Club、1010、csl.