Q1：5G 速度可以有幾快?
A1：快與唔快，睇你距離 5G 基站有幾遠，我在旺角兆萬中心附近，因為附近有 csl. 旗艦店，距離基站近，速度一定好快，用三星 S20 Ultra 跑咗 3 次 Speedtest，速度都有 700 Mbps 以上，呢個速度拍得住你屋企光纖寬頻。
問題係，你要有咁嘅速度，首先你要喺 5G 基站附近，所以 700 Mbps 以上，只係一個理論上做到嘅速度，而版主搭巴士由大埔出旺角果段路，大約九龍醫院附近，測過一次速，下載速度為 24.2 Mbps，而上載速度則為 30.6 Mbps，以行走中的巴士上來看，呢個速度你又收唔收貨呢？
Q2：基站在旺角兆萬中心果頭，行到幾遠仲收到 5G？
純粹分享下我嘅經驗啦，兆萬中心對面用 S20 Ultra 測速有 7 百幾 Mbps，沿住西洋菜南街向先達方向，一路行行行行到連住屈臣氏果間豐澤，因為入咗去同相熟朋友吹下水，順便測下速，速度跌到 6 百幾左右，其實都 keep 到好快，基本上西洋菜街果段路，都收到超高速的 5G 網絡。
之後再繼續一直行行行，行到先達隔離間百老匯 (對唔住又係 R 水吹)，再試過測速，就跌到淨返百幾 Mbps 左右，可以預計到若果我一直再向前行多一條街左右，應該就去到極限。
去完旺角，之後版主就搭地鐵過去新蒲崗個私竇，一落到地鐵站，其實已經見到變返 4G，所以目前嚟講，5G 應該未能夠落到地底，讓搭地鐵嘅乘客享受 5G 服務。
Q3：30GB 數據會唔會好快用哂？
無可否認，會，但都係睇你點去使用。版主今日一日用咗 20.62GB 流動數據，當中做過啲乜？同大家報告一下我嘅記錄，當中最耗數據嘅項目有：
--> Netflix 下載咗 2 次 第一季嘅《屍戰朝鮮》 (9.78GB)
--> YouTube 播放咗半個鐘嘅 2K 影片 (2.05GB)
--> 跑咗 N 咁多次 Speedtest (6.94GB)
--> Tethering 畀華為 P40 Pro 去做 Speedtest (1.64GB)
其實最估唔到，係 Speedtest 會食咁多數據，老實話多，又唔係真係跑得勁多果種，睇返 Record 今日都只係跑咗 6 次，已經用咗 6.94GB (所以用 5G 嘅你，唔好成日心思思想跑 speedtest XD)。反而播 YouTube 2K 片半個鐘，用咗 2.05GB 數據，呢樣算係比較合理。
你問我，30GB 數據會唔會好快用哂，如果你一般 Streaming 睇片，理論上同 4.5G 唔會話差太遠，最主要係因為快，你好自然會用數據去下載唔少東西，例如用數據下載 Netflix 影片，愈快下載完，你下載得愈多。Well，呢啲都應該係正常人嘅心理嚟嘅。
Q4：5G 會唔會好耗電？
呢樣我可以 share 一下畀大家睇，我由今朝 9 點幾出門口，做完咁多項測試去到而家夜晚 7 點半，具備 5000mAh 電嘅 S20 Ultra 淨返 51%，但當中屏幕開啟時間，都只係 2 小時 4 分鐘，即係畀到盡使用時間最多都係咁多，咁其實如果咁睇，2 個鐘用咗一半電，咁好似都算食電。
