新 SIM 登場！$199 入手中港澳台四地 5G 年卡！可增值 + 送香港本地通話費

左定坤 (Cho Ting Kwan) 2024-10-09 16:13 | Csl

以前年卡好多時都只係講緊本地數據，但近年來愈來愈多花款，唔單止好多都開始陸續升級埋 5G，而且有啲仲玩埋多地共用數據。好似之前曾經介紹過，Lucky SIM 子品牌 Lucky2，就有張中港澳台四地 5G 年卡，而且仲有得無限任用漫遊數據，呢張係幾有特色。而最近留意到有個同樣租用 csl 網絡嘅 MVNO 公司，亦都新推出一張中港澳台四地 5G 年卡，到底呢張新 SIM 又賣幾錢，而同 Lucky2 嗰張比，又有咩唔同之處呢？睇下文啦！

快閃 $199 有中港澳台四地 5G 年卡

最近留意到現代移動 MORE MOBILE 推出咗一張全新嘅 5G 數據年卡，包中國內地、香港、澳門、台灣 4 地共用數據，張卡定價 $499，但當然新卡買返嚟唔需要咁貴，留意到有間賣 SIM 嘅咭檔由即日起至 2024 年 11 月 30 日，就將佢快閃賣 $199，並且會加送香港本地通話費 $100。

同 Lucky2 四地上網卡有乜唔同？

同之前介紹過嗰張 Lucky2 上網卡有咩唔同呢？雖然大家都係 sell 中港澳台，但細睇都有啲分別：

001：首先 Lucky2 係純上網卡，無通話分鐘，而 MORE MOBILE 就有加送 2000 香港本地分鐘。

002：另外，Lucky2 張上網卡雖然都係 30GB，但使用上有限制，分配咗 10GB 係 for 本地用，而且得 4G，實際中國、澳門、台灣用嘅，係 20GB，呢 20GB 就有 5G，但好處係用完數據之後，可以繼續以 384kbps 任用漫遊數據，而 MORE MOBILE 呢張就 30GB 你想邊度用就邊度用，無限制幾多 GB 香港，幾多 GB 中澳台，不過用完 30GB 就會即停。

003：呢張 MORE MOBILE 可以增值，就算身在海外都可以網上增值，而之前我介紹張 Lucky2 上網卡，嗰陣呢張卡係無得增值，confirm 緊而家有得增值未，但佢哋其後有張 20 國 / 40GB 上網卡，就首次支持增值。

報價查詢：HongKong Sim 香港咭檔