每月俾多 $28，換取較短合約期
3 香港係 18/3 即係後日星期三，推出一個針對 iPhone 6 與 iPhone 6 Plus 上台客嘅服務，叫做「悅換悅新 Flexi Pass」。老老實實，聽左個名都唔知佢攪乜。好啦，等版主解釋過你知。「Flexi Pass」你可以當係一個無合約嘅「增值服務」。簡單來講，係你嘅 iPhone 6 或 iPhone 6 Plus 月費計劃裡面，每月加多 $28，只要你俾足 6 個月，就可以第七個月起，用番你個 Number 換手機。以 3 月 18 日推出日期計算，六個月後，就係習慣上新 iPhone 推出之時，你可以用「Flexi Pass」換新 iPhone。
以現時 iPhone 6 係 3 香港嘅出機計劃，最少要簽 24 個月合約。本來半年後，你要買新 iPhone，你要在餘下 18 個月合約上，再加多一份合約，假設到時都係 24 個月合約，即係你份約，可能長達 42 個月。而出新 iPhone，你又要俾多份機價預繳。
若果你參加了「Flexi Pass」，即係每個月俾多 $28，即係共 $168。半年後，你一樣可以出新 iPhone，但係玩法唔同。首先，你之前簽左份合約會報銷，一切從新開始。假設新 iPhone 合約係 24 個月，咁你就欠 3 香港 24 個月合約，唔駛加上去。
此外，之前回贈未完嘅 iPhone 6 機價預繳，會用來先扣除新 iPhone 嘅預繳，假設未完嘅預繳係 $3000，新 iPhone 預繳係 $6000，你只要俾 $6000 - $3000 預繳就可以。
跟 3 香港對賭
當然，你要跟網絡商對賭兩件事：Flexi Pass 下換機計劃，月費係有加無減 (或者唔變)。雖然加陣月費加價多過減價，但你又點知半年後新 iPhone 月費會唔會減價？另一件事係，版主問了多次 3 香港代表，去到十月，Flexi Pass 換機客買新 iPhone 是否最快？3 香港表示要睇當時情況與安排，假設半年後，九月中出新 iPhone，Flexi Pass 客人係最快定最慢得到新 iPhone，家陣無人會知。而中間多過六個月嘅 Flexi Pass 保險費，你一樣要俾。即係最低 Flexi Pass 成本價，未必係 $168 咁少。對賭呢件事，睇下你信唔信 3 香港。第十六個月起，可以轉用平月費
「Flexi Pass」第二個亮點，係你供滿 15 個月 ($420 保險費?) ，可以轉用比較平嘅月費。假設你用緊 iPhone 6 6GB 用量月費，每月要俾至少 $570，第 16 個月起，你可以揀返同樣 6GB 用量嘅「帶機上台」計劃，每月 $286，每月平 $284 月費？係嘅，不過你要再簽番 24 個月合約，同埋你之前其實已供了 $420 Flexi Pass 保險費。即係又要同呢個網絡商由以前談 24 個月戀愛，增長至 39 個月，咪又係長約。抵唔抵，自己想下。
Flex Pass 唔一定新買 iPhone 6 嘅客人先用到，舊客都得，但玩法唔同。由於 18/3 3 香港先正式公佈，以下帶來今日介紹會嘅 Presentation例子，唔明可以問版主，不過最好都問番 3 香港代表，佢地比我明白更多。
