豐澤新出 haha SIM 硬拼自由鳥、AIRSIM！日韓台漫遊數據 $10 / 日 無限上網

左定坤 (Cho Ting Kwan) 2019-12-17 15:46 | 3 香港

自從 Travel SIM 推出之後，相信愈來愈少網友去旅行之前，會特登走出鴨記買 SIM，因為簡簡單單買張卡之後，就可以隨時在手機 App 上買 Plan，其實非常方便。市面上比較出名的，應該有自由鳥遨遊 SIM、AIRSim 等，而豐澤日前都想分一杯羹，推出 haha SIM，日韓台漫遊數據低至 $10 / 日無限上網，又能唔能夠同自由鳥、AIRSim 鬥呢？睇內文啦！

haha SIM 入手詳情

賣價：$100
儲值額：$100
購買地點：豐澤門市 / 網店
網絡提供：3HK

睇完上面簡單的入手詳情，首先 haha SIM 有一個優點，就係方便。豐澤門市唔難搵，好容易搵到一間，就算真係附近無豐澤門市，網店購買一樣得，算係幾方便。

haha SIM 漫遊數據收費詳情

上面講嘅就係入手嘅詳情，而家就要講重點：漫遊數據嘅收費詳情。haha SIM 目前有 5 個收費組合，分別為「亞洲 5 地」($10 / 日)、「亞洲 10 地」($15 / 日)、「歐洲 / 中東 / 非洲 48 地」($23 / 日)、「澳紐」($18 / 日)、「北美」 ($18 / 日)，總共覆蓋超過 70 個旅遊熱點。

而即日起至 2020 年 2 月 29 日，更做緊日本的優惠，同樣只需 $10 / 日，比起自由鳥還要便宜。在相同價錢下，一樣每日有 500MB 數據 + 128kbps 無限數據，同時亦可以隨時加購漫遊數據，你又會揀 haha SIM 定自由鳥呢？


▲ 可以見到

而再比較埋 AIRSIM，雖然門面上睇，AIRSIM 都係寫住日本數據 $10 / 日，但唔同之處在於，AIRSIM 玩法係多買多平，要買到 9 日 Data，先至可以有 $10 / 日，如果單單只係買 24 小時，就 $30 有 1GB，並不見得比起 haha SIM 便宜。
 

	豐澤 haha SIM	自由鳥遨遊 SIM	AIRSim
日費	$10	$15	$30
數據用量	無限 (每天 500MB 後 FUP 至 128kbps)	無限 (每天 500MB 後 FUP 至 128kbps）	無限 (每天 1GB 後 FUP 至 256kbps）
「1 日」定義	香港時間 (GMT+8) 00:00 至 23:59	國家 (首都) 或地區的當地時間 00:00 至 23:59	24 小時
支援 Tethering 嗎？	支援	支援	支援
購買方式	直接用信用卡經 App 加購日費	直接用信用卡經 App 加購日費	直接用信用卡經 App 加購日費

▲從價錢上來看，豐澤 haha SIM 好似幾抵玩，不過版主發現有個不解之處，就係佢一日嘅定義，居然係以香港時間嘅 00:00 至 23:59 嚟計算，你去近嘅地方例如台灣、韓國、日本等等，可能就影響不太大，但如果你去到歐美地區，時差相距大，可能就會有好大影響。