中國聯通一卡兩號儲值卡復活！限時免費送中國大陸號碼，抵？

左定坤 (Cho Ting Kwan) 2020-03-23 13:56 | 3 香港

而家好多網絡商，上台都會送一卡兩號， 不過如果唔想上台， 而家仲有無一卡兩號儲值卡呢？有， 就算係 3HK 萬能卡，都做到，加錢就得。 除咗萬能卡， 唔知大家仲有冇印象，其實以前中國聯通都有一張跨境王加強版儲值卡， 嗰陣時好好用， 但唔知點解長期缺貨， 版主我自己都只係成功買到一兩次。 不過，最近我又收到一卡兩號儲值卡復活嘅消息， 而且入手門檻都低咗， 網友又會唔會入返張呢？睇下文啦！



都係中國聯通， 一卡兩號儲值卡復活啦！ 不過我唔係講緊跨境王加強版嗰張， 嗰張如無意外繼續冇貨， 但中國聯通就將一卡兩號呢個功能 ，下放到普通版嘅跨境王儲值卡上， 最平 $75 有交易，有 $80 儲值額。 比較返之前跨境王加強版嘅價錢， 嗰陣都要賣 $138， 咁其實而家入手門檻係低咗好多。

咁普通版嘅跨境王儲值卡， 如果想加個內地號碼， 又係唔係免費呢？ 答案就係今年內免費， 而根據版主收到嘅消息， 去到下年就會收返 $10 一個月。 咁其實呢個價都唔算貴， 就算係 3HK 萬能卡都要 $19 一個月啦。 補充一點，中國聯通開內地號碼都係要實名，方法應該同版主以前寫過的相差無幾，網友又會唔會諗住入返張，養個中國號碼呢？留言討論下啦！



更多儲值卡優惠情報，請按此 (手機) 請按此 (電腦)