呢排網絡商之間掀起一場減價戰，將 5G 月費計劃減價，例如 $149 100GB，又或者 HKBN $68 無限 5Mbps 等等。而其實同一時間，最近有間網絡商都再推特別優惠，月費低至 $105.8 就可以享有 60GB 數據，又係咪吸引呢？想知詳情，睇下文啦！
今次講嘅網絡商，係搶先帶起 $149 100GB 計劃嘅 3HK，大家都知而家好多 3Shop 都同豐澤門市結合咗，變成「店中店」㗎啦，而最近佢哋再進一步進駐百佳超級市場，令上台、買手機更加方便。不過，暫時並未做到間間百佳都有「店中店」，只係得 5 間，分別為金鐘、何文田、藍田、啟德以及沙田嘅分店，但佢哋都表示之後會陸續登錄到其他百佳超級市場。
除咗進駐百佳搞「店中店」之外，若果唔係有特別嘅月費優惠，又點吸引到大家上台呢？所以佢哋都推出咗百佳「店中店」專享嘅月費計劃，其中就以 5G 共享計劃最抵玩，低至 2 個人可以 Join，最多可以 5 人共享。愈多人 share，上台門檻就愈低，不過可用嘅 5G 數據就會相對愈少。
就以 2 張 SIM 為例，月費 $288 + $1，即係 Total $289，平均每人 $144.5，就可共享 300GB 嘅數據，即每人可有 150GB。而其後增加額外 SIM 卡，每張加 $80，最多可以 5 個人共享，即係話總月費為 $288 + $1 + $80 + $80 + $80 = $529，平均每人 $105.8，並且平均每人有 60GB 可以用，唔知呢個 Plan 又係咪啱你心水呢？
