衛星服務幾時有？收費如何？
3HK 宣佈，衛星通訊服務會喺 7 月 1 日開始接受登記，而呢個衛星服務會喺 7 月 11 日正式開通，即係到時就可以利用衛星服務打出打入，或者發送短訊。而 3HK 衛星通訊增值服務收費如下圖 (按圖可放大)：
▲ 月費低至 $19，合約期 24 個月，包每月 2 分鐘嘅衛星通話 / 短訊，如果利用衛星服務打電話或者發送短訊去非香港號碼，就要另外收 IDD 收費。而如果平時成日需要行山或者出海工作，則可以考慮更高嘅價錢，可以以月收費，$300 用 31 日有 50 分鐘 + 5 個短訊，亦可以 $1500 用一年，包 300 分鐘 + 100 個短訊，視乎你個人需要。
3HK 推出中港澳三地 5G 計劃
除了宣佈衛星服務開通日期及收費，同場亦宣佈推出中港澳三地 5G 計劃，有 30GB 以及 50GB 兩個選擇，月費分別為 $158 以及 $188，而且包本地無限數據，用完 30GB 或者 50GB 之後，可繼續 FUP 無限任用，並包每月 3000 通話分鐘。如果獨立 Join 呢個 Plan，係無衛星通訊服務。
同場亦宣佈推出升級版「一卡兩號」服務 + 尾號配對
香港人鍾意北上消費，3HK 以及 Supreme 早前就推出咗升級版「一卡兩號」服務，月費 $28，身處香港亦可以內地電話號碼發送短訊及致電內地，並新增 VoLTE 高清話音，免費提供每月 20 分鐘內地話音，同時新增「撥號更改功能」，於內地致電內地流動電話號碼或任何香港電話號碼，只需輸入對方電話號碼，唔需要加入國家及地區編號。另外，相信大家平時北上叫車，都好清楚一上車，第一時間司機會問你電話號碼後 4 個字幾多，而 3 及 Supreme 特別推出尾號配對服務，為客戶配對尾數四個數字同香港號碼相同嘅內地號碼，唔使驚唔記得尾 4 個號碼係幾多，相當方便。
