iMobile 推出「5G 環球通」計劃
說的是有線寬頻推出嘅手機台 iMobile，如果單純以本地 Plan 嚟講，我就唔係太建議 Join，主要係因為佢租用嘅，係中國聯通網絡，而中國聯通本身亦租用緊 3HK / csl 網絡，變相係「租上租」，隔多咗一層，質素正常都唔會比上一層好。但如果佢哋而家推出咗一個叫做「5G 環球通」計劃，對於平時成日周圍飛，需要出 Trip 嘅網友嚟講，你又會唔會因為呢個 Gimmick，而考慮上台呢？講返 iMobile 呢個「5G 環球通」，佢有兩個月費選擇：$128 同埋 $198，前者包 24GB 本地數據，送 3GB 澳門 / 內地以及 3GB 環球數據*，而後者則包 50GB 本地數據，送 5GB 澳門 / 內地以及 5GB 環球數據*。兩個 Plan 同樣都係需要簽 24 個月合約，攜號轉台過去可以免行政費。另外，本地通話分鐘係無限任打，不過講真今時今日真係好難打到幾千分鐘，無限任打本地係唔係 point，就真係見仁見智。
*環球數據地區包括: 日本 / 韓國 / 新加坡 / 馬來西亞 / 泰國 / 越南 / 澳洲 / 新西蘭 / 印尼 / 菲律賓 / 俄羅斯 / 柬埔寨 / 缅甸 / 斯里蘭卡 / 老撾 / 俄羅斯 / 英國 / 愛爾蘭 / 意大利 / 奧地利 / 瑞典 / 丹麥
按這裡有更多詳情