推廣完結，七月份帳單日起正式收費
其實中國移動香港嘅中港數據共用，包括 4G LTE 網絡，一直以來都只說推廣，只是推廣期一直推遲，CMHK 一直說，用家係中國大陸使用 4G LTE 係要收費嘅。而中國移動香港亦係 30/5 靜靜地係網站更新資料，表示七月份中國 4G LTE 數據漫遊優惠會完結。不過，唔係七月一日起立即收費，佢地係照你嘅帳單結算日計算，假設你嘅 CMHK 戶口，係每月 6 號截數，咁新收費會係七月六日才開始。用大陸 TD-LTE 雙重收費
中國移動 4G Pro 月費計劃用家，本來係可以係中國大陸用照以 2G GSM、3G TD-SCDMA 或 4G TD-LTE 網絡上網，計劃內首 5GB 數據用量，是中港共用。不過，由 2015 年 7 月 起，使用 CMHK 母公司中國移動係大陸建設嘅 4G LTE 網絡，要額外收費，更誇張嘅係，香港計劃裡面嘅數據用量，係照扣可也。即係係大陸以 4G 網絡上網，係雙重收費。
▲ 係 CMHK 網頁嘅中國漫遊數據用量收費，已係 30/5 更新: 「2015年7月賬單日起，服務計劃內之本地數據用量及額外數據用量均可用作扣除中國漫遊2G及3G數據用量。申請中國內地4G數據漫遊，請按*110*612*01# 申請，收費為$25/0.5GB，並需扣除本地/額外數據用量。」
對比之前說明優惠後完結收費為每日 $50，今次落實以 $25/0.5GB 作為打通中國 4G LTE 數據網絡嘅使用費用。值得留意，呢個收費係「額外收費」，你係計劃裡面嘅首 5GB 數據用量，係會照扣取架! 以下係兩個例子：
1) 若果你嘅 4G Pro 低用量計劃，假設係得每月 1GB 用量，當你係中國大陸使用 4G LTE 網絡，用至 2GB ，除了要付多 $30/0.5GB 計劃內額外數據收費 (本身計劃是 1GB，共用了 2GB 即要多買 1GB 用量)，即係 $60 (30 x 2)。還要將你係中國大陸使用嘅 2GB 再收費，俾多 $100 ($25 x4)。
2) 用得多，俾得更多。假設你用 4G Pro 6GB 計劃，純係大陸用了 5GB，以前是沒有額外收費，現在就要俾多 $250 ($25 x 10)。
唔俾錢，主力用 2G!
今次 CMHK 中國 4G LTE 數據漫遊優惠完結，但一直做開嘅中港共用計劃依然繼續，4G Pro 月費計劃用家，若果你唔申請開通接通大陸嘅 TD-LTE 網絡，依然可以透過中國移動嘅 2G GSM 及 3G TD-SCDMA 網絡上網，收費依然是扣除首 5GB 香港嘅數據用量。不過，用家要注意，香港電器店標榜中港 4G 嘅智能手機，有部份不支援 3G TD-SCDMA。由於中國移動係大陸全力發展 4G TD-LTE 網絡，近一年來版主返大陸已鮮有接通到 3G TD-SCDMA 網絡，覆蓋一日差過一日，加上本身 TD-SCDMA 制式限速上網速度，大部份時間唔會過 500kbps，就算破到牆都唔會快。其實以中國移動的財力，全球之冠，一直 CMHK 都以中港漫遊專家作賣點，今次收費，係咪要錢唔要客，定係國有國規，唔想香港人咁容易，咁便宜係大陸高速破牆，各位網友，自己想想。
▲ 中國移動係中國大陸嘅 3G ，使用 TD-SCDMA，而係香港標明中港 4G LTE 網絡支援手機，部份係無 TD-SCDMA 制式嘅支援。
▲ 早在兩年前，版主已跟大家分享用 iPhone 5s 係可以接通中國移動 3G TD-SCDMA，當日係深圳試，上網速度最高只係 1Mbps，以兩年前，大陸未有 4G LTE 網絡情況下，係可以接受。事實上，現時中國移動大陸全力發展 TD-LTE，呢個 3G TD-SCDMA 覆蓋發展已停頓下來，親身感受到大不如前嘅感覺，早前版主係北京出差，酒店內收到 4G TD-LTE，2G GSM，但欠缺 TD-SCDMA，同樣事情亦越來越多發生，現在返轉頭，只做 2G GSM 及 3G TD-SCDMA 中港數據共用，跟本係服務倒退。
更多資料：CMHK 推出中國 4G 數據漫遊嘅儲值卡，每日收費 $68 / 1GB 中國大陸全速 4G LTE 用量