升級版 華龍 4G 一年電話卡 進軍便利店
上年發現呢張 MNP 攜號神器，係深水埗桂林街 SIM 檔。今年發行商信京 SHINETOWN 擴大發行網，係總有一間係咗近嘅 7-11 便利店發售。呢張名為「華龍 4G 一年電話卡」採用三合一設計 SIM 卡 (適合全部手機使用)，賣 $168 (比上年 3G 版加咗價)。開卡有效年期為 365 日，包了 2GB 本地數據及 1000 分本地及致電中國大陸嘅通話時間，當中再無每月行政費。即係當你完全唔增值，平均每個月都有約 170MB 與 約 83 分鐘打底！呢張卡嘅 4G / 3G / 2G 都係採用 CMHK 中國移動香港嘅網絡。呢張新版卡，依舊接受 MNP 攜號轉台，跟上年一樣，只要到 Shinetown 信京電訊係銅鑼灣嘅門市完成就可以，MNP 帶號碼轉台手續費 $20。$168 面值，再加 MNP $20 手續費，即係 Keep 號碼嘅你，一年支出不過是 $188，每月不過是十六蚊左右支出，好過上台出無得上網，只有話費嘅計劃啦。
▲ 採用三重卡設計，即係 MicroSIM，Normal SIM 及 Nano SIM 卡槽嘅手機都可以用到。
▲ $168 有 2GB 本地數據 + 1000 分鐘本地通話及致電中國。其實也有一款 $288 有 5GB 本地數據加一千分鐘，但 5GB 版本，要去指定門市購買。
▲ 一插入手機，手機會自動認出採用 CMHK 嘅 APN。
▲ 速度都不錯，應沒有限速。
新玩法，用完可以增值
華龍 4G 一年電話卡，加入了增值增量玩法，即係你用完 2GB / 1000 分鐘，都可以加錢再用。收費見下表。我覺得全年計劃最抵，因為原來第二年收費可減至 $98 平上加平，而中間添食計劃，以全速 4G LTE 計算，收費不算太貴，是儲值卡的合理範圍。
▲ 其他收費。
同 Hello 卡相比，誰抵
講到平價儲號碼服務，大家一定想到係 csl. 嘅 Hello 卡。csl. Hello 卡一直有入場費平，卡價只係 $38，每月只收 $2 行政費嘅特別，兼送無限免費 csl. WiFi。不過，要帶號轉台 Hello 卡，唔係易事。首先 Hello 卡其實外傭專用，本地人去申請，唔係唔得，怪 D 囉。此外，唔係間間 csl. 門市都肯做，要打電話去熱線預約。此外，若果要開 Plan 打電話、上網收費都唔平。而「華龍 4G 一年電話卡」帶號上台，每月平均都要 $16，感覺貴一點。但因為已包一定數量話音與數據，要用嘅話都比較方便。「華龍 4G 一年電話卡」與 csl Hello 卡，一家又點揀？仲有無其他儲值卡問題，都可以係會員或 Facebook 跟版主發問。