收費平絕 CMHK 儲值卡
是咁的，網上流傳一張中國移動香港 CMHK 係官網搵唔到，官方 Facebook 都無介紹的 SIM 卡，叫 「4G / 3G 新家園手機卡 New Home Prepaid SIM」，呢張卡有兩個賣點，首先，話費極平，每分鐘接聽及打出都 $0.05，比起 Kabayan SIM 卡，仲要平每分鐘 $0.01 仙。而上網計劃 $18 / 10 日無限 3G Lite 上網，同様 3G Lite，CMHK 門市賣緊嘅 「4G/3G數據及話音儲值卡」要 $30 / 10 日架！即係要無限上網，$54 有 30 日。記得早前版主同大家計爛數，要買卡「射錢」先做到 30 日無限上網嘅 CMHK Kabayan SIM 卡，更加方便！係咪好想要呢？
要申請「關愛家園卡」
不過咁，呢張 CMHK 「4G / 3G 新家園手機卡 New Home Prepaid SIM」，右上角有「新家園協會」協會嘅標誌，原來係 CMHK 同呢間機構合作嘅手機卡。跟據資料顯示：「新家園協會」係六月份推出了「關愛家園卡」嘅活動，目標會員係基層市民，據報導指出，Target 都有 97 萬人，數目唔少。而 CMHK 亦發行了一萬張 「4G / 3G 新家園手機卡 New Home Prepaid SIM」配合「關愛家園卡」活動。簡單來講，你要先去「新家園協會」，申請「關愛家園卡」，就有機會得到呢張「4G / 3G 新家園手機卡 New Home Prepaid SIM」。資格包括新來港或少數族裔人士、年滿65歲並領取長者生活筆貼嘅長者 (香港永久性民居)、 年滿 70 歲嘅長者 (香港永久性民居)、 低收入家庭（綜援戶) 都可以先申請入會，再申領呢張 SIM 卡。
呢到就係「新家園協會」「關愛家園卡」申請表 Link
https://drive.google.com/file/d/0B7MZmIyobRG8V0E4cXlkSlktV0U/view
呢到就係「關愛家園卡」的申請資格資料
https://drive.google.com/file/d/0B7MZmIyobRG8X3RsclFJS25taHc/view?usp=drive_web
▲ 其實資料顯示，呢張 CMHK 「4G / 3G 新家園手機卡 New Home Prepaid SIM」六月已有，不過 CMHK 對呢件事都好低調，官網無，新聞稿都無。比較有趣係，網上有人用左幾分鐘打電話就唔用，要放出來賣，賣價仲要比原價貴。可見有部份新來港人士或弱勢社群可能窮到一個點，連手機卡都要賣。
▲ ePrice 版主成日會去 Coffee Shop 寫稿，但老老實實，Coffee Shop 嘅飲品，真係好貴。「新家園協會」「關愛家園卡」其中一個優惠係可以係 Pacific Coffee 享有九折優惠！咁弱勢社群出街個陣要涼涼冷氣，都唔一定要去老 Mac 啦！
網絡商有善心幫助弱勢社群，真係要俾個讚！版主覺得，如果想更多人受惠，不妨考慮下本地綜援家庭、傷殘人士都直接得到優惠 Plan，只係做新家園會員先有，又要申請多一輪都幾麻煩喎，不如直接d，等更多有需要的人受惠 ，仲好啦！
好事不妨多講，立即分享呢個咁好嘅消息，俾你身邊有需要的人，多多關心社會弱勢人士啦！
你唔係弱勢社群，又想平價上網，可以考慮用 CMHK Kabayan SIM 卡，我哋有晒教學啦
CMHK Kabayan 卡巴仁新玩法！$55 高速 4G 無限上網
又係 CMHK Kabayan! 上網 Plan 又減價，最平 $45 4G 無限上網
資料來源：HKEPC、香港商報、新家園協會