CMHK 一招解決人多網絡擠塞問題！33 萬人塞爆維港，5G 下載速度仍可達 380Mbps
左定坤 (Cho Ting Kwan)
2024-10-02 18:49
|
中國移動香港
啱啱過去嘅國慶 75 周年，維港兩岸聽聞就有成 33 萬人一齊圍觀煙花匯演，雖然原定仲有無人機表演，最後因為「天文現象」而起唔到機，但都無傷市民大雅，有煙花睇，一樣咁好睇。現場睇煙花，你會第一時間做啲乜？如果係我，首先係 post 相打卡呃 like，然後開始嗰陣，可能會拍片 Upload 上 Facebook，或者開直播 share 畀朋友睇。但 33 萬人圍埋一齊，正常情況下好容易會造成網絡擠塞，導致網速勁慢甚至上唔到網。而 CMHK 就做咗以下措施，解決呢個問題。想知做咗啲乜，睇下文啦！
首次引入「應急通訊車」，解決人多網絡問題
CMHK 引入咗全港首部「應急通訊車」，喺 10 月 1 日國慶 75 周年煙花匯演現場，已經首次登場，為欣賞煙花嘅客戶提供網絡保障，而未來佢哋都會透過呢部「應急通訊車」，去應對各種大型活動爆多人時嘅網絡情況。
國慶 33 萬人睇煙花，下載速度仍達 380Mbps
呢架「應急通訊車」融合咗衛星、微波、光纖等多種全新傳輸科技，提供 700MHz - 4.9GHz 全頻段大容量網絡服務，你可以理解為一個專為大型活動而設嘅流動基站，邊度有大型活動舉行，就將架車駛去現場，為附近一帶嘅網絡容量提升 2.4 倍，變相比平時可以容納到更多嘅人同時上網，保持網絡流暢。就喺啱啱國慶煙花匯演期間，如果你係 CMHK 5G 客戶，下載速度更高達 380Mbps，而上載速度亦有 30Mbps，應付上傳影片或者開 Live，都綽綽有餘。
彈性自由係優點？
相比起其他網絡商，有啲網絡商會喺一些大型演唱會場地增設黃金頻段或者 mmwave 基站，去解決人多時嘅網絡問題，而 CMHK 呢部「應急通訊車」其實原理同其他網絡商都大同小異，但優點係夠哂流動自由，無演唱會嘅時候，可以唔使用到，有大型活動時，先駛過去，咁就更加彈性啦！唔知網友又點睇呢個「應急通訊車」呢？
