SmarTone 數碼通業績報告爆 5G 覆蓋！立即 Check 開台你嗰到用唔用到

Keith Yim 2020-02-19 08:53 | 數碼通

是咁的 ，SmarTone 係 2 月 18 號，公佈咗 2019 / 2020 年度中期業績，佢哋呢半年賺定蝕，留番大家 Search 下財經版嘅報導。不過，係佢哋嘅業績簡報中，版主驚見佢地放咗一張有關 5G 覆蓋的地圖喺到。大家睇咗，大約會知道佢哋之後 5G 開台，你去開嘅地方，會唔會有 5G 服務。



SmarTone 係 2 月 18 號公佈 2019 / 2020 年度中期業績，係 webcast 上面，佢哋展示咗一份簡報表，其中一項：「An Industry-leading 5G Network well-underway」上面，就有一張網絡覆蓋地圖。當中包括咗未來嘅 5G 覆蓋。



High Band (28GHz) 即 mmwave，代表用 5G 超高頻段。圖中藍點部份就係覆蓋點了。我哋見到主要係九龍與港島地段。其實 28GHz 高頻段，只可以做到繁忙地區，小地段覆蓋，用來應付大量上網群眾，所以覆蓋之細，也不足為奇。手機來講，已肯定 Samsung Galaxy S20+ 跟 S20 Ultra 會支援到，但係市面上其他 5G 手機就仲未支援到呢個頻段。若果，大家想日後用到埋呢個頻段嘅 5G 訊號，記得揀啱手機。 (剛收到消息，Samsung Galaxy S20 系列香港版，不會支援 mmwave 頻段)

圖中嘅 Mid Band (3.3/3.5GHz) 即係業界叫作的 5G 黃金頻段，亦即係地圖上面紅色部份。呢個覆蓋就係主要 5G 手機都收到嘅地方。地圖上，九龍好似與港島連成一塊，其實代表部份維港及香港水域都會有 5G 覆蓋。

另外，大家會留意，係 5G 開台初期，新界大部份地方，都收唔到 Mid Band 頻段嘅 5G 訊號,例如大埔一帶；北區也只有少部覆蓋。而新界西如元朗、天水圍、新田近落馬洲，似乎都收到 Mid Band 5G 訊號。若果你成日出入或住係將軍澳、屯門、荃灣區，Mid Band 5G 覆蓋好廣，你好大機會享用到 Mid Band 5G 網絡。

值得留意嘅係，SmarTone 表明會用 Low band (900MHz / 1.8GHz /2.1GHz / 2.6GHz)，即現有嘅 4G 頻譜做 5G 網絡。不過，因為本身 4G 頻譜容量始終不及 5G 頻譜，到時上網速度上都唔會有用 5G 頻譜，即上面講嘅 High Band 與 Mid Band 咁快，但 5G 本身又唔止係速度咁簡單嘅，未來好多應用，Low Latency 呢個特別都好重要，咁用 Low Band 做 5G 可以連室內覆蓋都解決到，就最好啦。


▲ SmarTone 業績簡報，有寫明佢哋 5G 網絡架構會係點，亦表明年中會開台。

資料來源：SmarTone