BlackBerry Dtek60 今日開賣，大舖平價再減，抵唔抵？
唔知大家仲記唔記得，今日係 BlackBerry Dtek60 正式開賣的日子，就在剛剛一星期之前，版主就已經爆左俾大家知，呢部 Dtek60 的建議零售價。Dtek60 配備了 S820 處理器，內置 4GB RAM 以及 32GB ROM，仲要有 2100 萬像素主鏡頭 + 2K 芒，除左儲存空間好似少了一點之外，基本上 $4498 呢個價錢，可以話係力壓 Sony Xperia XZ。估唔到，本身 Dtek60 已經賣得唔算貴，大舖居然仲有「一出即減」(Dtek50 果陣係無即減架
)？大舖開賣即減 $300，最新賣價為 $4198，網友會唔會考慮呢？
▲ Dtek60 今日正式開賣，大舖有「即減 $300」的優惠，雖然唔算減好多，但以呢個 spec 來看，呢個價錢算係吸引，網友點睇呢？
Sony S820 旗艦系列，Xperia XZ、X Performance，你點揀？
Sony 今年其實都推出過兩部配備 S820 處理器的旗艦手機，一部係 Xperia X Performance，而另一部則係 Xperia XZ。其實如果就個 spec 來看，其實 Xperia XZ 的升級並不算太大，不過 Xperia XZ 相機的確係強大了不少，特別是在影片拍攝方面，XZ 的五軸電子防震技術，確係其他手機無法比擬。唯一問題係，雖然 Sony Xperia XZ 最近大舖減過一次價，最新賣價為 $5198，但整體來說都仲係有減價空間。反而版主覺得，Xperia X Performance 而家減到 $3998，又似乎差不多係入手的好時機！網友又認唔認同呢？
▲ Sony XZ 大舖最新賣價為 $5198，而上代 X Performance 賣價則已跌穿四千，賣 $3998。
LG 模組手機，同樣四千唔洗，又會唔會考慮呢？
唔少廠商每年都會推出兩部旗艦手機，當然 LG 亦都唔例外，除左開賣了無耐的 V20 之外，仲有就係上半年推出的模組手機 G5。老老實實，版主覺得 LG 手機其實都有水準的，但我真係唔明白，點解設計上會有咁多瑕疵。以上係版主個人主觀睇法，並不要求網友同意。而 V20 更打破了網友對 LG 手機的概念，一而再，再而三地加價，衛訊賣到 $5698，呢個價錢其實又唔係咁容易令人接受。不過，G5 而家跌到 $3998，算係一個合理的價位，你又覺得係唔係呢？
▲ G5 同樣都跌穿左四千，都係 $3998，但 V20 就長期話缺貨，仲要頻頻加價。
高性價比 S821 手機！
講到 S821 手機，目前可以選擇的並不多，特別是已經香港有得賣的，數來數去，唔係小米 5s Plus，就係 ASUS ZenFone 3 Deluxe。ZenFone 3 Deluxe 賣到 $5999，相信大部份網友都唔會考慮。要講平的，應該就係今日正式上市的小米 5s Plus，賣價 $2999，有 S821 + 6GB RAM + 128GB ROM，雖然好多網友會話，小米幾勁都好，都唔值呢個價錢，但無可否認，佢算係目前咁多部手機當中，性價比叫做最高。有無網友會有考慮入手呢？
▲ 目前性價比最高，而香港又上左市的手機，應該會係佢。
BlackBerry Dtek60 在文章發表時，大舖賣價為 $4198，按這裡有詳細規格及最新賣價。
Sony Xperia XZ 在文章發表時，大舖賣價為 $5198，按這裡有詳細規格及最新賣價。
Sony Xperia X Performance 在文章發表時，大舖賣價為 $3998，按這裡有詳細規格及最新賣價。
LG G5 在文章發表時，大舖賣價為 $3998，按這裡有詳細規格及最新賣價。
LG V20 在文章發表時，大舖賣價為 $5698，按這裡有詳細規格及最新賣價。
小米 5s Plus 在文章發表時，賣價為 $2999，按這裡有詳細規格及最新賣價。
事實上，S820 的手機，點止以上介紹的咁少？仲有 HTC 10、小米 5 等等，版主就唔同大家逐一講。不過，咁多款的 S820 / S821 手機之中，網友又認為，邊部係年度旗艦機皇，邊部最好？歡迎大家在下面投票啦！
