BlackBerry 聽日就會在香港舉行發佈會，發表新一代的黑莓手機 KEY2，而版主已經搶先收到風，得知這部 KEY2 的價錢。根據版主收到的消息，KEY2 的建議零售價為 $5688，見到呢個價錢，雖然算是意料之內，但依舊令我覺得：唔係呀化？賣咁貴？美金價計返都係 $5094 左右咋喎。講真，呢個價錢正常應該可以買到一部旗艦手機，但係呢部 KEY2 並非旗艦，極其量只能說是一部中高階手機，貴嘅只係個實體鍵盤，又係唔係真係值呢？見仁見智。
不過，平心而論，買得 BlackBerry，就一定唔會用來打機，始終佢係一部商務機，所以在規格上的要求，其實不會太大，只要用落覺得順暢，就可以。KEY2 採用了 4.5 吋 3:2 LCD 屏幕，配備了 Qualcomm S660 處理器，內置 6GB RAM 以及 128GB ROM，並且具備 12MP + 12MP 雙主鏡頭，以及 8MP 前置鏡頭，電量則有 3500mAh。另外，KEY2 會預載 Android 8.1 作業系統，並具備 DTEK 保安功能，每個月都可得到保安更新以及至少一次主要的系統版本更新。
而如果講到抵玩，版主會覺得而家買返上代 KEYone，或者會更明智。當然講得出呢句，都係粉絲先會說出口，一般網友都未必會買 BlackBerry。上代 KEYone 最近在衛訊做緊限時優惠，$4288 就可以買得到，當然其他大舖如百老匯，亦都已經跟風落價。但 $4288 買 KEYone，係咪叫平？其實都係貴。反而如果係我，我會考慮水貨，旺角先達水貨賣價約為 $2980，感覺上似乎容易出得落手多啲。網友又點睇呢？
BlackBerry KEY2 在文章發表時，建議零售價為 $5688，按這裡有詳細規格及最新賣價。
