開箱鳥~
要深入分享黑莓機定製版 Android 系統其實是非常繁複，皆因內裡很多細小的功能、捷徑、設定都為商務人士而設，尤其是其系統安全設定 DTEK、BB Hubs 等。本 YK 號稱玩機無數，在眾多 Android 機裡需要睇說明書的產品，就只有 BlakcBerry 的手機，尤其是這部 KEY2 鍵盤機，唔睇肯定唔識用！
▲ 話明黑莓，包裝係黑盒。呢部銀色版的 KEY2 被我稱為瘦身「Passport」。唔知道我講乜「Passport」？ 自己 Google 下啦～
▲ KEY2 主要規格都清楚列出，除了處理器有大進步外，其他都無太大驚喜。
▲ 拉出紙套後就是盒真身，其實個人中意呢種，低調才是我的風格～
▲ 最重要的說明書，好多人都係屬於「唔識用就話唔好用」嘅朋友，強烈建議睇清楚嗮說明書先用機！
▲ Type C USB 數據充電線，以及印有 BlackBerry Logo 的 3.5mm 耳機。
▲ 隨機附送火牛支持 5V/3A、9V/2A、12V/1.5A 三種充電模式。
▲ 真身登場！第一眼觀感是瘦身「Passport」，標誌性的銀黑金屬外殼。
▲ 後備是鑽石紋防滑膠，KEY2 的造工比之前 KeyOne 和 Priv 都要好，防滑膠無虛位，握感也是超乎想像地好！
▲ 機身頂部保留 3.5mm 耳機孔，以及收音孔； 7 系鋁合金邊框打磨工藝非常好，沒有任何菱角，摸下去非常的舒服。
▲ 機身底部是 Type-C USB 接口，喇叭及收音孔，也能看到手機的天線；是的，鍵盤空白鍵同時也是指紋識別器。
▲ 前鏡頭 800 萬像素，無自動對焦，支持屏幕打光功能，但你真係唔好對前鏡的畫質有太高期望，稍後再講。
▲ 電容式背光「三天王」，4.5 吋屏幕採用 IPS LCD 組件，3:2 長闊比例的解析度是 1620 x 1080，市場罕見的規格。 只是大猩猩玻璃有一定厚度，較容易造成反光，降低可視度。
▲ 左側是三選二卡槽，是金屬框架喔，但不少商務朋友都話：點解唔做真三卡槽？
▲ 機身右側右側是快捷鍵、有刻紋的電源鍵，以及音量鍵。
▲ 主鏡頭改為雙 1200 萬像素鏡頭：廣角 f/1.8 相位對焦鏡頭；長焦 f/2.6 相位對焦鏡頭。
▲ 四列的背光鍵盤，空白鍵同時兼容指紋識別器，解鎖速度爽快。但不明白左右下角整塊黑色扮按鍵做乜？ 其實係 Click 唔到落去。
▲ 右下角有個「九點按鍵」，官方稱為 Speed Key （SK）。 本身長按鍵 / 短按鍵都可以設定捷徑，多一個 Speed Key 就有多一層空位設定更多捷徑，例如 「SK + F = 打開 Facebook」、「長按 F = 打開 Firefox」。對於多工型新人類黎講，係一個很實用的功能。
性能測試：多 RAM 有分加
上一代 KeyOne 比人話用高通 625 處理器太弱，今次 KEY2 就改為高通八核心 660 處理器，配合 6GB RAM + 最高 128GB ROM （本 YK 手上的是 64GB 版）。 其實商務機用 660 都足夠有餘，開工日日玩遊戲？日日睇 Youtube ？ 我用了快兩個星期，最常見的功能是回覆 IM 通訊軟件、撰寫電郵、Twitter 睇 / 發文、睇新聞等，得益於 6GB RAM，感覺操作速度順滑。內置實用功能多多，加強版日曆、BB Hubs、密碼管理器等，只係。。。 點解無通話錄音啊！
▲ KEY2 安兔兔跑分只有 127084，比同屬 S660 處理器的 Nokia 7 Plus 少一萬分。
▲ 從讀寫速度看，達不到 UFS 標準。我覺得商務機來講唔用 UFS 2.1 係講唔過去，尤其係如果後台多野讀寫時，eMMC 唔夠通道做即時處理，會拖慢用戶操作反應。（不知道 128GB 版係咪都係 eMMC？等網友告知。）
▲ KEY2 內置 3500mAh 電池，支持QC3.0 快充技術。在 GeekBench 4 續航測試得分 4750，是很不錯的分數，比部分旗艦手機都要好（續航測試介紹請看這裡）。
鍵盤手感一絕！
本 YK 一向喜歡 QWERTY 手機，虛擬鍵盤輸入容易錯位，準確度唔高，長期打字會令人心煩氣躁。 以往除了黑莓手機，Motorola、Sony 等鍵盤機都係曾經服役的型號，可惜近代 Android 系統只有黑莓出鍵盤機，Priv 和 KeyOne 各種小問題如 S808 發熱、KeyOne 甩屏幕等，甚至最重要的實體鍵盤設計，本 YK 都未能收貨，但來到 KEY2 的新鍵盤終於獲得我「收貨好評」。
▲ 用開 KeyOne 的網友，如果你試玩過 KEY2 的新鍵盤，絕對令人眼前一亮。使用兩天後已能準確、快速地在鍵盤上舞動手指，打字成為享受與樂趣。
▲ 鍵盤支持左右滑動功能，實體鍵盤絕對係坐車時打字的好幫手，車震震你手震震，用虛擬鍵盤簡直係大災難。本 YK 親測用 KEY2 上疾速夜巴、亡命紅 VAN，都能準確輸入文字不受影響。
▲ 好多網友以為鍵盤做得好就無伏，但其實機背很重要。我用 KEY2 雙手打字時，全靠厚實的防滑機背，捉得緊之餘，同時成為手指發力的支點，打字就更高速。機背呢樣野 PRIV 和 KeyOne 做得非常差，係非常差！
改用雙鏡頭有驚喜？
今代 KEY2 跟上潮流改用「長短雙鏡」組合，雖然一直對黑莓商務定位手機的相機無太大期望，但心底里仍然希望會有好表現。以下有一堆實拍圖比大家參考下：
▲ 畫質看到很一般，放大後不難看到有一定程度的油畫化， 但整體上戶外色準表現很不錯，符合商務機「準確」的元素。
▲ 值得留意係室內光管環境下，1X 和 2X 變焦下，兩個鏡頭在同一場景下顯示色溫截然不同，而廣角鏡頭色準表現會更好。
▲ 左邊是 KEY2，右邊是某廠旗艦機，在暗位環境下 KEY2 油畫化嚴重，除了因為感光元件先天弱勢外，主動將 ISO 拉高的算法亦是一個弱點。
▲ KEY2 有一個令我驚喜的特性，手機放得好近都能夠對焦拍攝！ 好多旗艦手機在近距離拍攝時鏡頭會無法對焦，KEY2 就可以，估計是考慮到商務人士對拍攝文件 / 卡片等小印刷品的需求。
結論：好打鍵盤提高效率
KEY2 鍵盤確實係目前效率最高的手機，至少本 YK 體驗係咁。內建的功能都非常「商務定位」，而且擁有非常多的捷徑和設定，預載黑莓自家應用很多，但個個都係實用 Apps，我會稱佢為「真鍵盤戰士的專用機」，感覺就好似 007 特務用機。 而且黑莓緊貼 Google 發布的每月安全更新，最適合某類「安全更新少幾次會世界末日」的網友。
其實寫呢篇開箱文之前，我都唔知道可以點樣分享比網友知道 KEY2 鍵盤的優秀，因為手感正係好難以用文字來形容，因為唔係好多人會認為「打字爽快無錯」係重要。不少網友都問一個問題： KEY2 的香港開賣價 5688 元值唔值？ 我會同呢班網友講「唔值得」，因為問得呢個問題都唔會係實體鍵盤的用家。 如果你本身用舊 BB 鍵盤機，包括 PRIV 或 KeyOne，甚至更早的 Passport 或 Classic 等，本 YK 認為絕對值得升級上 KEY2，記住直上 128GB 版。如果你未用過又有興趣用 KEY2，我建議你都係等正式開賣後落大鋪玩下個鍵盤再講。
