KEY2 採用雙鏡頭方案，廣角 f/1.8 相位對焦鏡頭；長焦 f/2.6 相位對焦鏡頭。上一次快速試玩感覺畫質很一般。趕命咁去海馬公園玩，但主機忘記充電，唯有「頂硬上」用 KEY2 影少少相。 唔知係咪軟件更新左，估唔到拍出黎出乎意料之外，商務定位鍵盤戰士原來輕度旅攝都得。
出發嚕！
十月去海馬公園，簡直係去地獄，皆因萬聖節檔期，四處都係鬼怪當道，十足宜家網絡世界咁。本 YK 帶著一絲仙氣，殺入海馬地獄園，用盡港人免費入場福利都係理所當然的事。
▲ 園區鬼怪多，鬼佬都特別多，園內大家都打扮得非常妖艷，應該係「多妖少艷」先岩。
▲ 「入公園、睇熊貓」梗係指定動作，一家大細全家黑眼圈，熊貓一日訓 10 個小時都唔夠。
▲ 睇熊貓變成睇小熊貓，樣子很趣怪。 但 KEY2 在室內缺光的情況下，油畫化情況值得小心。但其實小熊貓同我有差唔多 5 米距離，咁都影到佢個「貓樣」算好彩～
▲ 小水瀨公仔就有一隻，玻璃裡面就見唔到，聽隔離個大媽講，話小水瀨潛左水。
▲ 海馬公園佈置都好應景，「布丁狗」都可以變成「南瓜狗」。
▲ 有無網友知道呢種植物叫乜名？ 本 YK 見隔離大叔用 5D Mark 2 + 小白係度影佢。我自然不甘落後，雙手揸實 KEY2，紮好馬步，CLICK 多幾下先離開～
▲ 「濕汗白衣、體育褲、全女班」定係「白皙骨感、深邃眼神、露齒笑」吸引你？
▲ 「做人無夢想，同鹹魚有乜分別？」但其實有夢想但得個想，其實慘過做鹹魚。
▲ 話明摩天輪，你要坐輪就要排隊輪。 本 YK 排到一半就走左，因為。。。 突然想起，唔想自己一條佬坐一卡，更唔想 J、Q、K 咁樣一卡。
▲ 話口未完，睇完個海豚、海獅 SHOW 拍爛手掌行出黎，我都係想影個無人嘅摩天輪姐，好嗎？
▲ 最後，我唯有同纜車師傅講，比一卡我安靜下，謝謝。
▲ 香港老大街的風味，總讓我短暫逃離虛榮假盛的現實，回到「N 十年代」令人懷念的時光。你地搵唔搵到幸運雜貨呀？
▲ 個牌好適合今日的我，好似係，應該係，肯定係～
▲ 再見，地獄一日遊到此為止，下年同樣時間再見～呃，呢個公仔樣子好似叮噹。
▲ 晚餐繼續用 KEY2 影相，當晚佢仲有約 40% 電量。
▲ 呢間餐廳晚市認真平又好食，肉軟味香咬多汁。但唔好 PM ME，我唔想太多人同我逼～
後記：
正所謂「屎急馬行田」，從來沒有對 KEY2 的相機報以高度期望。但就好似「私生子」執意離開之時，所謂的大後備「風之子」都要挺身而出，話比大家聽其實我係好努力好得，希望大家唔好睇少我。 關鍵時候幫上忙，可靠 + 穩定比什麼天才都重要，完。
