百老匯跟住做即減 $1,200！要留意計「單一貨品價」
老老實實，大鋪即減優惠版主已經講過不下三次，我諗睇開 ePrice 既網友應該好熟了吧。今日百老匯突然將「送贈券」優惠轉做「買滿即減」，同衛訊一樣都係差唔多八折既優惠，不過條款亦略有不同。首先呢個優惠係唔可以分期付款，亦唔可以同時做信用卡優惠；其次佢係計「單一貨品價」，例如買 LG G3 (32GB) 就最多只可以減 $1,000 ，即使連配件買都唔會有 「買 $6,000 減 $1,200」優惠，最後當然就係 Apple 產品(iPhone) 冇得即減啦。同衛訊相比，其實兩個優惠好接近，就 LG G3(32GB) 為例，兩邊都係送保護貼與原裝電池，然而衛訊如果買埋保護套可以減 $1,200 計落去划算少少。當然呢個優惠係唔知做到幾時，店員永遠都係果句：有買趁手。究竟係市場太淡定係趕住係新機出之前清貨呢？（或者兩者皆對
）
▲今日下午剛剛改了優惠，版主今朝睇都仲係「送贈券」，呢場減價戰愈演愈激烈。
先達回收價小跌！店員：「收機冇肉食」！
大鋪減價，最大影響應該就係先達同埋場內細鋪，畢竟價錢差唔多時侯，網友都會比較信大鋪的保養吧。版主留意到 HTC One (M8) 、 Sony Xperia Z2 、 Samsung Galaxy S5 同埋 LG G3 既場內回收價都比起之前跌左 $500 ~$600 ，呢幾部旗艦手機回收價平均都只係 $3,300 ~ $4,000 徘徊，不過場內跟單的「全新行貨」就冇咩點跌價。有問過場內鋪頭佢地點睇大鋪減價，佢地都直接話生意難做，佢地話其實而家收機真係「冇肉食」，仲話如果用超過大鋪即減價去回收，佢地不如直接去衛訊入貨賺信用卡積分（不過點散貨先
）。經常行場既版主 Eddie 都覺得一些賣平機、大陸性價比手機的鋪比之前靜了不少，或多或少都因為大鋪直減所影響吧。傳聞 9 月 3 號就會有 Samsung Galaxy Note 4， Sony 亦會在同一日舉行發佈會，而萬眾期待既新 iPhone 亦都傳聞快到，網友仲係咪「按兵不動」呢？留言講講睇法吧！
▲現在場內的回收價比起之前低上不少，不過大鋪的回收價好似冇咩點變， Trade-in 的話還是大鋪比較划算哩