泰國 SIM 卡，專供漫遊
全球化好嘢來，估不到連泰國 SIM 卡香港買得到，仲要係用來作漫遊數據。呢張叫 AIS SIM2Fly 原本由泰國 AIS 網絡商，有點似香港 csl. 推出嘅亞太區漫遊儲值卡，不同之處，係平好多。以呢張泰幣 399 baht (即約港幣 $85，深水埗 SIM 檔賣最平 $90），以包括亞洲十二個地區嘅漫遊數據，開卡用到八日，3G 或 4G 上網共 3GB 數據，用爆左都唔怕，仲有 128kbps 速度，等你 Keep 住用 WhatsApp, FB Messenger。呢十二個地區包括：熱門地區：香港，澳門，台灣，南韓，日本，新加坡，馬來西亞
冷門地區：老撾，印度，菲律賓，東埔寨，緬甸
只係因為呢張卡係泰國出品，所以無泰國呢個地區。版主當然去唔到咁多地區啦，但都幫大家格過價，以 HK$90 八日 3GB 嘅用量，用係韓國，新加坡，馬來西亞都係抵嘅。我亦會推介用係日本，始終網絡商漫遊卡，比起代理嘅 DoCoMo 平價卡穩陣得多 (AIS 用 Softbank)。而其他冷門地區，如印度，就更加無選擇中嘅選擇了。
因為版主係香港，只能係香港測速。無錯，呢張卡香港用得到架，$90 / 3GB 無限本地用量，係咪貴？又唔算嘅，佢地係香港用 csl. 網絡，駁得上 4G LTE，係下午八點左右，速度都有十幾MB，收晒貨啦。至於其他地區係點？有待網友測試。另外，因為佢係泰國 SIM 卡，用佢就睇唔到本地視頻如 ViuTV 或 myTV SUPER。
▲ 深水埗見到嘅 AIS SIM2Fly 有兩個版本，一個有中文繁體，係有心嘅 SIM 檔幕後人員自製，有時就買原裝 Packing。AIS SIM2Fly 係深水埗桂林街 SIM 檔，由 HK$90 －HK$100 一張不等。
▲ 三重卡試機，支援大，MircoSIM 及 nano SIM。
▲ 說明書只有少量英文。
▲ 香港代理已貼上可以使用地區。只要插入 SIM 卡，APN 設定為 Internet 只要接上網，儲值卡儲值立即扣至零，而八日上網就立即開始。
相比香港嘅漫遊數據卡，呢張卡好處是可以增值。人唔係泰國都做到？因為佢地有晒 web 介面，仲有英文語言選擇，增值接受海外信用卡。香港開卡，儲值額立即變零蚊，所以版主試用 Tap N Go 儲入 400 baht，成功左喎！增值有乜好處呢？AIS SIM2FLY 除左有呢個八日 3GB 用量亞洲通，仲有 15 日 3GB 用量嘅歐洲通選擇，用完一次，增值後再用 SMS Code 申請 Plan 就可以，之後再申請，亞洲通 12 個地區八日 3GB 收費係：349 baht，約 HK$75；歐洲通 。歐洲通 25 個地區 15 日 3GB 收費係 849 baht 約 HK$182，包括地區如下：
西歐：德國，意大利，荷蘭，西班牙，英國，法國
東歐：捷克，希臘，匈牙利，奧地利
中東：阿拉伯聯合酋長國，卡塔爾，
亞洲：香港，澳門，台灣，南韓，日本，新加坡，馬來西亞，老撾，印度，菲律賓，東埔寨，緬甸
美洲：美國
▲ 歐洲通其實係打通亞洲，歐洲與英國，使用期由八日變至 15 日，最高速度用量依然是 3GB。
▲ 用家之後，你可以繼續申請亞洲通。
六十蚊，七日無限上網 (基本使用版)
仲有一個平價漫遊計劃，真係平到笑，呢個版主叫全球通嘅計劃，何在全球五十個地區七日無限上網，收費為 246 baht，即約 HK$53。不過，呢個你當係方便應付簡單嘅 WhatsApp 與 FB Messenger 需要，因為佢係七日內，首 100MB 不限速，之後就係 128kbps，勝在夠平 Keep 住上網。最後提一提大家，上面講嘅亞洲通與歐洲通，AIS 網站寫住優惠價申請去到 2016 年 12 月 31 日。不過，版主估計會繼續機會好高。呢幾日你要出國嘅話，記得去深水址桂林街 SIM 檔一查。
▲ 呢個七日計劃，可供五十個地區上網，但高速只限首 100MB ，其餘限速 128kbps。但收費只係 HK$50 左右，用七日，堅平。
▲ 用家可以由 Web 介面增值。
卡名：AIS SIM2Fly
點買：深水埗港鐵站 C1 出口，桂林街賣 SIM 卡的排檔。
價錢：HK$90 - HK$100
2018 年 8 月 2 日更新：
AIS Sim2Fly 已加至 4GB 用量
亞洲通已加入中國大陸，但歐洲通沒有
香港信用卡增值已失效
賣價 ：HK$80 （亞洲通) - HK$220 (歐洲通)