如果你係手機不離手嘅，而且都相對高用量嘅，去到英國都唔洗限住上網。英國嘅手機台數目眾多，大嘅電訊商有 3UK、EE、O2、Vodafone、Orange 等等，而且有幾個質素好嘅 MVNO，包括 giffgaff、Lycamobile、Virgin 等等，直接咁講有競爭下個價錢相對優惠吧。
呢兩次我去英國用嘅電訊商為 3UK、EE、Vodafone，用呢三間野各有優點缺點吧，而我同唔同英國嘅朋友傾計時發現大家對電訊商傾好有唔同，同香港人一樣吧。會用到 3個台嘅原因係第一次去英國買張 3UK 同 Vodafone 呢個組合咁用，但對張 3UK 感覺麻麻，所以第二次就決定買 EE 同 Vodafone 呢個組合。
價錢
價錢方面，大家都幾海鮮價，落到地可能會睇到有唔同嘅優惠，不過對我黎講我要落到地就要有上網，所以多數都會預先買定上網卡， 而香港最容易買到應該係 3UK 同埋 giffgaff 嘅卡，大約港幣150-250元左右。 Vodafone 同 EE 應該難搵D，呢兩張卡我都係托朋友喺英國拎俾我（咁啱佢地喺英國返香港）。3UK 應該係最抵嗰個，20 英鎊包 30日12GB 43國上網，返到香港都可以上到。EE 同 Vodafone 價錢上都相對貴，如果 Vodafone 要一個月 5GB 就要 20鎊，而 EE 一個月4G 價錢為 12鎊，但有個朋友嗰陣佢無準備上網卡，落門市去申請左一張，只係 25 鎊就有 15GB 用，價錢有少少飄忽吧。
總結黎講佢地一個月價格為
3UK 20 英鎊 12GB 包歐洲上網
EE 12 英鎊 4GB 限英國上網
Vodafone 20 英鎊 5GB 限英國上網
接收
講下幾個情況下各台嘅接收能力吧，黎到 4G 世代速度都唔會差得去邊，基本上都夠用，而且去到歐洲都唔好覺得好似亞洲國家咁快吧。
▲ 當你喺香港用緊 3 嗰陣，走到英國都係見到誠哥嘅 3 蹤影，真係唔知笑好定嬲好。
英國的戶外
講下倫敦先吧，無論喺倫敦又好其他細城市都好，接收上差別唔大，都會收到滿格嘅 4G 訊號（當然你去左更三線、無咩人鄉郊地區另計）而使用上無論 Whatsapp、Facebook、上網等等都足夠嘅，至少唔會感覺去左落後地區先吧，當然呢個係基本黎嘅，戶外收得唔好應該要執左佢。
英國的室內
室入如果你坐近窗邊嗰陣，差別不大，但如果坐落地底或坐入少少嘅地方，3UK 已經走到 No Service，相反 EE 同 Vodafone 少有呢個情況出現，記得有次食飯因為未齊人嘅關係，搞手喺人未到齊嗰陣不時要走出去接收下訊號聯絡人，當然有好多舖頭已經接供左 Free WiFi Service，你可以禮貌地問下店員 WiFi password 解決斷網問題。
倫敦 Underground
喺倫敦嘅地鐵，基本上咩台都收唔到架啦，無論月台又好定係車廂入面，如果你係地底嘅就會收唔到電話，所以你約朋友時，你同佢上車嗰陣大家就要隔絕一下，喺倫敦坐地鐵可以準備一本書 or Down定野落電話睇。收唔到電話係好正常嘅事，倫敦地鐵嘅歷史仲老過我地好多，當年起嗰陣連電話先啱耐世，更加人類喺百幾年後會拎住部電話周圍走。
▲1928年 London Piccadilly Circus Station，1928 年香港連地鐵都無。
雖然 2011 年華為曾經因為倫敦奧運關係打算喺倫敦地鐵建設造價達到 5000 萬英鎊嘅地鐵手機網絡，當時 Vodafone 同 O2 都應承左一齊承擔建設費用，即使喺華為大手地資助下，最終英國政府以資訊安全為由拒絕，直到今日搵係上唔到網。
▲喺倫敦坐地鐵都係要「數碼戒毒」。不過有時想喺月台到同人聯絡都唔係好難，只要你落地之後去你張電話卡公司門市到詢問一下職員點樣連接到地鐵月台嘅 WiFi ，佢地好樂意幫你設定嘅，你就可以喺月台到上網。
火車
去到英國，除咗留喺倫敦之外，都會走去周邊城市搵朋友吹個水食個飯即日來回火車都唔係好貴，如果你早買飛的話來回 Oxford 同 Cambridge 都係10 鎊左右，有埋 Rail Card 仲平添，所以坐火車都係一個好平常嘅事黎嘅，如果你係會坐火車嘅留意下，以我去 Oxford、Cambridge 同 York 為例，沿途都會收到電話嘅，不過少有 4G 網絡，好多時都係 3G，甚至 Vodafone 會成日跌左落去 2G GPRS。即使 3UK 同 EE 都好，收得多 3G 網絡，但斷線都有嘅，唔好預嗰個時間去打 D 需要一直連線嘅遊戲。整體上我覺得火車呢個位上 EE 表現會好過 3UK，當然我只坐過 3 條火車路線，可能去其他地方又係唔同嘅表現呢。
▲2017 年仲有 GPRS 上網感覺好神奇。
歐洲上網
第一次去倫敦嗰陣叫做小弟第一次進入歐洲，而且旅行時間長嘅關係，小弟有 Plan 到光速法國之旅，兩日嘅時間走左法國兩個城市，包括空中巴士生產地 Touluse 及法國首都巴黎。當時 3UK 同 Vodafone 卡都有歐洲漫遊服務，基本上落到機係唔洗換電話卡，一卡走盡歐洲，但諗唔到兩張卡喺法國係兩個世界嘅差別，應該係大家漫遊協議公司有所不同。
直接咁講，如果你淨係拎張 3UK 嘅卡行巴黎大多數地方都無咩問題，收到上網但唔會快速，甚至只收到約2-3格嘅訊號，落到地鐵已經係 No service，走到羅浮宮參觀，唔知點解 3UK 喺羅浮宮只收到約1格嘅訊號，甚至出現斷線，明明喺窗邊都收得好差，相反 Vodafone 卡用嗰間公司就一直收得不錯吧，落到地鐵都收到1格訊號，可以同到人 Whastapp 等等。
之後就去坐左歐洲之星返去英國，全程法國段 Vodafone 卡表現不錯，可以一直上網，穩定地無斷線，相反 3UK 就不斷地斷線，當時娘親 Whatsapp Call 打黎都斷左兩三次先完成整個對話，但走到英國段之時兩者都回復正常嘅接收。
▲歐洲之星，一個來回英國倫敦法國巴黎之間嘅高速鐵路，另一個特點係除左喺英法隧道之外，其餘時間都可以收到手機上網。