OFCA 最後定案
今日香港 OFCA 通訊事務管理局公佈決定，在 900 - 1800 頻段，在 2020 年 11 月起開始到期後，採用混合方案重新指配給營運商。當中 60% 頻譜作公開拍賣；40% 頻譜作優先權指配予各使用中的四大網絡商，包括 csl，數碼通，中國移動香港及 3 香港。現時四大網絡商中，全部 1800 頻段都曾用於 PCS (GSM1800) 服務，後期轉為 4G LTE，數碼通更一直用 1800 頻段作為 4G LTE 主頻全港覆蓋，1800 亦是港鐵的 4G LTE 主要採用頻段。今次政府決定，每間網絡商，保留 2 x 10 MHz 作優先指配，即係每間網絡商，都有 2 x 10MHz 可保留，但需另付頻譜使用費。保留 1800 頻段目的，以 OFCA 所以說，是為了確保 4G LTE 服務在港鐵範圍內的延續性，並且確保全港的 2G GSM 服務的延續性。其餘都要作拍賣之用。至於 900 頻段到期部份，政府決定全部不作指配，全作拍賣。最後 1800 頻段會有 70MHz；而 900 頻段會有 50MHz，共有 120MHz 頻譜供現有四大網絡商及未來加入者，用錢鬥大， Bid 返去再提供服務。2018 年底的 900 / 1800 頻段公開拍賣，亦係近年最多頻譜可作再拍賣的年份。
▲ 1800 / 900 頻段一共有 200MHz，當中有 40% 會以優先權指配給現有網絡商，全部都係 1800 頻段，而餘下嘅 60% 為拍賣頻譜，當中有 2 x 25 MHz 係 900 頻段，有 2 x 35 MHz 係 1800 頻段。
▲ 而優先支配頻譜裡，3 香港、csl. (HKT)、中國移動香港 CMHK 同埋數碼通 SmarTone，分別都可以保留 2 x 10MHz 的 1800 頻段。假設有網絡完全不參予，或於拍賣中全輸，乜都投唔到，都仲可以有最少 20MHz 的 1800 頻段可以繼續提供服務，即最少 13% 的 1800 頻段。
▲ 唔係有錢就可以買起哂所有頻譜，每間網絡商可以購買的頻譜都會有個上限，最多可以購買 90MHz；而 900 頻段，則最多可購買 20MHz，即係政府唔會容許有一間網絡商，買起晒全部頻譜。
csl. 大量頻譜無得留底，要拍賣
政府呢個決定，對香港四大網絡商建網有什麼影響？似乎 csl 影響最大。1) csl. 經過與 PCCW 合併，擁有最大量 1800 / 900 頻段 (72.8MHz 1800 頻段與 16.6MHz 900 頻段)，當中只有 20MHz 1800 頻段肯定可以再用，其他全部要再拍賣過。csl. 一直標榜嘅高速，其實好靠當中擁有最大量的 1800 頻段資源與 2600 頻段作 CA 載波聚合協同，今次有超過一半頻譜變為不穩定因素，佢地仲可唔可以用香港上網最高速作賣點？
2) 數碼通由 4G 開台，給人感覺是主打 1800 做主頻，但原來佢地只擁有 26.4MHz 嘅 1800 頻段，大部份都可以透過指派 Keep 住。佢地家陣 4G 網絡，也透過 2100 與 2600 頻段作支援，主頻不受大影響。反而主打 2G GSM 家居電話服務與 4G 室內覆蓋嘅 900 頻段，佢地都有 26.6MHz，未來佢地家居電話服務存廢與怎樣處理室內覆蓋，大家要留意。
3) 3 香港有 26.6MHz 900 頻段與 23.2MHz 1800 頻段，與數碼通一樣，1800 頻段資源大部份得保留，但因為 10MHz 900 頻段是由 2011 年 850 / 900 頻段拍賣買回來，所以今次政府不會再收佢地全部嘅 900 頻段。但留意嘅係 3 香港已用 900 頻段作 4G LTE 覆蓋，900 也有利室內接收，今次抽起大部份再拍賣嘅不穩定因素，會否影響佢地室內覆蓋部署？
4) CMHK 基本上是沒大影響，佢地一直都無 900 頻段，1800 頻段都唔係多，只有 26.4MHz，當中 20MHz
保留，跟本係零影響。但大家都知，佢地因為無 900MHz，做 NB-IoT 及 4G 室內覆蓋都會輸俾人，加上母公司中國移動財力，拍賣佢地會否天價搶更多 1800 與 900 頻段，大家都係要留意。
900 與 1800 頻段會係 2018 年底再拍賣，到時香港手機網絡，又會變成點呢？
