3.3GHz + 4.9GHz 新頻段供應
今日政府公佈嘅 5G 發展新政策，之前版主都介紹過， 大家可以 click 呢到重温。當中，佢地好重點介紹高頻段 26 / 28GHz (mmWave) 的免費指派及有機會不收費的頻譜使用費。但原來這不是新安排，只是落實及完善早前公佈的政策 (按呢到重温)。
而比較影響 5G 香港的發展，是多加了 4.9GHz 及 3.3GHz 的中頻段，共 200MHz 的頻譜供應。被業界稱為 C Band 的中頻段，是 5G 作大範圍覆蓋的最重要成份。之前，香港政只釋出共 200MHz 闊度的 3.5GHz 頻段，之前業界認為供應實在太少，假設香港四大網絡商投得同樣份值約 50MHz 3.5GHz 頻段，所產生嘅上網速度，唔會快得過 4G 好多。
另外，3.5GHz 頻譜亦因為跟大埔工業村及赤柱一帶的衛星發射站相衝，所以附近一帶變成 3.5GHz 5G 的結界，影響範圍好大，有近一百萬當區居民用唔到 (按呢到睇下有幾嚴重)。
而今次加入的 3.3GHz 及 4.9GHz 就沒有「結界」呢個問題，全港適用，令影響範圍的居民都用到中頻 5G 服務。
不過，我哋要注意嘅係，3.3GHz 只提供室內覆蓋之內，即係商場，大型會議中心等。而 4.9GHz 實際也只有 100MHz 闊度，係非「結界」地方，本來可以跟 3.5GHz 作合併使用，但係「結界」地方少一條頻就少一條頻，冇左就係無左。
但另一方面，4.9GHz 頻段會在今年年底完成清空工作，3.3GHz 局限於室內使用，也可在今年年底後給予 5G 供應商使用。政府預計，今年年底完成相關頻段拍賣及指配工作，最快明年2019 年第三季，能讓各網絡商提供 5G 服務，比起之前，中頻段要等到 2020 年，快咗大約七個月左右。
專家之言：5G 開始未必有足夠手機選擇
香港互動市場商會創會會長方保僑表示，政府今次釋出 3.3Ghz 及 4.9GHz 頻段，供 5G 使用，而推出日期都加快是一件好事，不過，他亦提到，就算網絡商係 2019 年第三季可以推出到中頻段 5G 服務，都只會做到全港兩成覆蓋左右，要全港性覆蓋，至少多等 18 至 24 個月，都係比其他地區慢。方保僑亦補充，現時來講，3.3GHz 與 4.9GHz 頻段以中國大陸及日本採用為主，跟 3.5GHz 5G 是歐亞主流有分別，在推出初期，因為支援頻段不同，有機會唔係部部 5G 手機都係香港收到 5G 訊號，大家手機選擇會比較少。另外，香港中頻段 5G 頻譜分散，3.3GHz 更只做到室內覆蓋，在規劃及舖網上，會有一定難度及麻煩。
▲ 香港互動市場商會創會會長方保僑
網絡商免費使用 5G 頻譜?
今日政府公佈新 5G 頻譜，有提供 5G 頻譜有可能係免費分配，而使用費亦有機會免費 (詳見另一文)，但免費指配及低甚至是免費頻譜使用費，只限 26GHz 及 28GHz 高頻段 MMwave，一如之前版主之前文章都講過，高頻段 5G 只能做到室外及大型活動場的覆蓋，實際使用體驗，可能只係高速及街外版 WiFi，跟中頻段 5G 可以戶外及戶內地方使用有好大分別，另外，業界及 OFCA 自己都有講，要建立一個全面 5G 網絡，不同頻段配合都好重要。而 3.3GHz、4.9GHz 及 3.5GHz 嘅頻段使用費，其實唔係免費，亦未正式公佈。
▲ OFCA 資料都表明 5G 服務要同時需要高頻段 (6GHz 以上，香港來講，即 26 / 28GHz) 及低頻帶 (於香港即 3.3GHz / 4.9GHz 及 3.5GHz 頻段) 提供不同程度及環境的覆蓋。
太長太長，等版主再簡單咁講
001: 香港中頻段 5G 服務會有：3.5GHz (全港覆蓋，除了「結界」限制地區，詳見呢到)；4.9GHz (全港覆蓋) 及 3.3GHz (全港室內覆蓋)002：香港高頻段 5G 服務會有：26GHz 及 28GHz 主要用左定點細範圍室外覆蓋，以供大量用家及高速上網之用。
003：政府預計 26GHz / 28GHz 高頻段 5G 可以 2019 年 4 月可供使用。
004：政府預計 4.9GHz / 3.3GHz 中頻段 5G 可以 2019 年 第 3 季可供使用。
005：政府預計 3.5GHz 中頻段 5G 可以 2020 年 4 月可供使用 (但有「結界」限制區)。
有關香港 5G 更多文章
香港有平價 5G 流動服務？！政府：更多 5G 頻段＋更平嘅使用費網絡商確認香港有 5G 結界！開網 100 萬人無得升級
政府還擊！香港 5G 發展唔係慢半拍！最快 2019 年 4 月有得用
香港 5G 結界有無解決？解構政府新 5G 頻譜政策