開箱圖賞
事先講明，今次本 YK 光速掃貨原因除了平之外，我「另一半」早幾日跌爆手機亦係誘因，買黎送比佢玩。所以開箱就真係開箱，唔會有乜跑分性能、電力續航測試之類。但我發現唔少網友都對 Essential PH-1 不太了解，只係知道佢係 Android 老豆作品 + 年度劈價王，可能因為香港無行貨，無幾多人知道呢部機，甚至玩過真機。其實版主次次出 Essential 減價文，都有網友問我係乜黎？ 有無試玩過真機？ 很遺憾，本 YK 之前只係在水貨鋪短暫玩過，今次終於「正式」玩真機！
▲ 星期一落單，星期三下午收貨，送住宅又無額外收費，DHL 真係良心企業。
▲ 包裝盒真係好醜樣，如果要我用一個阿拉伯數字黎形容，我會選擇「7」，分分鐘放係條街度都無人會留意，「隔離」山寨手機廠的包裝都好睇過佢！
▲ 值得稱讚係 PH-1 的封條開盒設計，確保係處子之身，並列明盒內有乜配件。
▲ 開箱了！一機、一線、一火牛、一轉插，一說明書、一卡針，完。
▲ PH-1 的火牛是我見過最有質感的，金屬外殼具備一定份量，揸落去絕對好過塑膠牛。
▲ 自然就唔係英規火牛，支持 5V/3A 和 9V/3A 兩種充電模式； 但要注意，火牛鏈接手機的線材，必須是 type-C 對 type-C，跟市面上絕大部分的都不同。
▲ 隨機附送的充電線兩端都是 type-C，如果你有 type-C 電腦接口就無問題，否則你又要自己另外購置一條良好的 type-C to type-A 線材。
▲ 取消了 3.5mm 耳機孔設計，PH-1 隨機附送一條 type-C to 3.5mm 耳機轉插線。值得稱讚係不論是轉插線 / 充電數據線，都採用其他廠少用的尼龍編織物料，增強耐用度及減低「線亂纏繞」的情況。
▲ 卡針，保養說明書，但去得「森林」買野，預左大部分都係無保養 / 需要自費寄送保養。
真機登場！
「估唔到真機咁正」，呢個係我第一個感覺。機身比想像中輕巧及細小，或許是得益於「無邊框屏幕」設計及機身重量分佈平均。PH-1 聲稱用上鈦合金打磨成機身，並配合陶瓷物料，加強機身整體抗扭曲能力，以及提高機背抗刮能力。鈦合金中框的硬度獲得外國媒體高度讚賞。
▲ 正面有 5.7 吋屏幕，無「凹額」但有美人尖，好彩唔係用味精 AMOLED 而係 IPS LCD，唔怕睇壞眼。
▲ 陶瓷物料製作出磨砂質感，本 YK 認為 PH-1 背部觸感勝過絕大部分旗艦機。
▲ 1300 萬像素雙鏡頭，黑白 + 彩色組合，在 f/1.8 大光圈加持下，卻因初期算法不成熟而飽受批評。經過多次軟件更新後，PH-1 的拍攝表現才勉強見到主流旗艦手機車尾燈；還有指紋感應器及多功能金屬觸點，但我不推薦加錢買任何配件，暫時未見過有人話唔後悔。
▲ 歐美流行的單 SIM 卡設計， Type-C 接口（無 3.5mm 耳機孔）和外放喇叭都位於機身底部。
▲ 電源鍵及獨立音量鍵都在機身右側。
▲ 機頂有一個訊號指示燈，紅、黃、綠顯示充電狀態；前鏡頭 800 萬像素，但不支持自動對焦。
▲ 開機喇，但只係開一開比大家睇無邊框的程度。機身算細小，本 YK 一手揸得到。
▲ 唔似得某某廠咁，PH-1 的邊框看起來比官方圖更窄。上有「美人尖」，下有「闊下巴」，但係香港同人撞款機率會比較低，撞到的話可能都係讀者朋友。
結論 ：價錢無敵
一部行高通 S835 處理器，4GB RAM + 128GB UFS2.1 ROM， 加上無邊框設計，配合堅固的鈦合金 + 陶瓷背，成套硬件 Package 配合「貼身」的系統升級， 肯定可以上 Android 9.0 Pie 版，聽到都已經覺得正。 但如果要做主力機，得 3040mAh 電、無得插記憶卡、有「美人尖」、拍攝表現一般、保養又麻煩，這些隱憂確實令人卻步。但全新無開封賣比你 1800 元港幣，呢個價錢買到 PH-1，重新將我推落火坑，肯定爽過買小米、OnePlus 啦！
其實呢次如果你有 Citi 卡、或者做免費 Prime 會員，可以再平 10 蚊、15蚊美金。但下一次要唔知等幾時再減價，有可能係終極清貨 199 美金，有可能，但要慢慢等，有可能掛。BTW，聞說有人被 Cut 單，有無網友都成功搶到貨？ 一齊分享下啦～